Qazaqstanda azyq-túlikke jumsalatyn shyǵyn 14 paıyzǵa ósti, dep habarlaıdy stat.gov.kz
2023 jyldyń ekinshi toqsanynda azyq-túlik pen sýsyndarǵa jumsaǵan shyǵyn 13,9% ósip, 421,1 myń teńgeni qurady.
Azyq-túlik taýarlarynyń barlyq shyǵyndaǵy úlesi 92%, jalpy tutyný shyǵyndarynan 52% qurady.
Salystyrý úshin: 2022 jyldyń sáıkes kezeńinde azyq-túlik pen alkogólsiz sýsyndarǵa jumsalǵan aqsha 369,8 myń teńgeni qurady, bul bir jyl burynǵy kórsetkishten 9,6% artyq.
Óńirler boıynsha azyq-túlik pen alkogólsiz sýsyndarǵa eń kóp shyǵyn Túrkistan oblysynyń turǵyndary arasynda tirkeldi: toqsanyna 557,5 myń teńge – bir jyl burynǵydan 13,9% artyq.
Tamaqqa kóp aqsha jumsaıtyn óńirler: Mańǵystaý oblysy - 551,6 myń teńge, Atyraý oblysy - 512,4 myń teńge, Ulytaý oblysy 502,5 myń teńge jáne Almaty oblysy 484,3 myń teńge.
Azyq-túlik pen alkogólsiz sýsyndarǵa shyǵyndardyń jyl saıynǵy eń úlken ósimi Ulytaý oblysynda, eń azy - Pavlodar oblysynda baıqaldy.
Turǵyndardyń azyq-túlik jáne alkogólsiz sýsyndarǵa jumsaǵan shyǵyndarynyń qurylymynda eń kóp úlesti 33,4% et jáne et ónimderi alyp otyr: respýblıka boıynsha ortasha kórsetkish - 140,6 myń teńge. Bul ótken jylmen salystyrǵanda 14,7% artyq.
Ekinshi qatarda nan ónimderi men jarma ónimderi tur: 64,5 myń teńge. “Úshtikti” sút ónimderi japty - qazaqstandyqtar olarǵa 44,7 myń teńge jumsady, bul 2022 jyldyń ekinshi toqsanymen salystyrǵanda 21,4% kóp.
El turǵyndary jemis-jıdekterge 35,1 myń teńge, kókónis satyp alýǵa 34,3 myń teńge, qant, kondıterlik ónimder men táttilerge 28,1 myń teńge, maıǵa 22,7 myń teńge, alkogólsiz sýsyndar men balyq,teńiz ónimderine 17,6 myń teńge, jumyrtqaǵa - 9,1 myń teńge jumsady.