15 sáýir – Qozy Kórpesh – Baıan sulý ǵashyqtar kúni retinde mereke bolyp atalyp keledi.
Bul kúndi atap ótý týraly bastama 1999 jyly kóterilgen eken. Atalǵan mereke HIV-XV ǵasyrlardaǵy Qozy Kórpesh –Baıan sulý mahabbatarynyń sımvoly retinde atalyp ótiledi.
Ǵashyqtar kúniniń shyǵý tarıhyn Almaty-akshamy.kz Massaget.kz-ke silteme jasaı otyryp, habarlaıdy.
Jyl saıyn bul mereke 15 sáýir kúni atalyp ótedi. Máńgilik mahabbat sımvolyna aınalǵan Qozy men Baıan kúnin alǵash 1999 jyly qoǵam jáne memleket qaıratkeri Darhan Myńbaı usynǵan edi. Ol jastar uıymdary, oqý oryndary men buqaralyq aqparat quraldaryn ulttyq ǵashyqtar kúnin merekeleýge shaqyrdy. Darhan Myńbaıdyń bastamasy kóptiń kóńilinen shyqqany ras, biraq merekeniń naqty datasy kópke deıin belgilenbeı, ár óńir ártúrli toılaı bastady. Máselen, Tarazda 15 sáýir — Qozy Kórpesh – Baıan sulý kúni, Semeıde 11 naýryz – Baıan kúni, al Qyzylordada 19 mamyr – Qozy kúni atalsyn dep jan-jaqqa tartty.
2011 jyly Almaty ákimdiginiń jastar saıasaty basqarmasy 15 sáýirdi – Ulttyq ǵashyqtar kúni retinde ózderiniń resmı sharalarynyń qataryna qosty. Al 2012 jyly elordadaǵy Seıfýllın atyndaǵy Qazaq agrotehnıkalyq ýnıversıtetiniń stýdentteri mahabbat kúnin qazaqtyń ulttyq "Aqsúıek "oıynymen jańǵyrtyp, jastar oıyn-saýyǵyn uıymdastyrdy. Dál sol jyly Kókshetaýdyń erikti jastary da Qozy men Baıan kúnin Táýelsizdik alańynda atap ótti. Sodan beri qos ǵashyqtyń kirshiksiz sezimin dáriptep, ulttyq mádenıetimiz ben salt-dástúrimizge negizdelgen merekeni toılaıtyn jastardyń sany birtindep artyp keledi.
Qozy Kórpesh – Baıan Sulý jyry
Qozy Kórpesh — Baıan Sulý eposy – halqymyzdyń injý-marjany, asyl qazynasy. Bir-birine qosyla almaǵan qos ǵashyqtyń qaıǵyly mahabbatyn jyrlaıdy. Lıro-epostyq jyr XIII-XIV ǵasyrlardan bastap jyrlanyp, XIX ǵasyrdyń ortasy tusynda qaǵazǵa túsirildi. Qozy men Baıan eposy Sybanbaı, Bekbaý, Janaq, Shóje aqyndar arqyly aýyzdan-aýyzǵa tarap, urpaqtan-urpaqqa jetti.
Búginde 20-ǵa jýyq nusqanyń ishinen eń belgilisi – Janaqtyń nusqasy. Mahabbat jyry Sarybaı men Qarabaıdyń ań aýlap júrip, bel quda bolýynan bastalady. Eki áke serttesip, Qozy men Baıandy qospaq bolady. Biraq, ań aýlap júrip, uldy bolǵanyn estigen Sarybaı balasyn kóre almaı qaza bolady. Ýaqyt óte, dúnıeqońyz Qarabaı "qyzymdy jetim ulǵa bermeımin" dep, bir kezderi otaryn juttan qutqarǵan Qodarǵa uzatpaqshy bolady. Qos ǵashyqtyń qosylýyn qalamaǵan Qodar aılasyn asyryp, Qozyny óltiredi. Qaıǵydan qabyrǵasy qaıysqan Baıan Sulý ósh alý úshin qýlyqqa basady. Ol Qodarǵa qudyqtan sý alyp berse, oǵan kúıeýge shyǵatynyn aıtady. Qyzdyń sózine sengen Qodar onyń burymynan ustap, qudyqtyń túbine túse bergende, Baıan burymyn kesip tastaıdy. Osylaısha, Qodar túpsiz tuńǵıyqqa qulap óledi. Sodan keıin Baıan ǵashyǵy jatqan kúmbezge kelip, óz-ózine qol jumsaıdy. Belgili jazýshy, dramatýrg Ǵabıt Músirepovtiń osy attas pesasy bar. Shyǵarma 1939 jyly sáýir aıynda jazylyp bitken. Baıan Sulý – Qozy Kórpesh tragedıasy alǵash ret 1940 jyldyń 29 sáýirinde M.Áýezov atyndaǵy Qazaq memlekettik akademıalyq drama teatrynda sahnalandy. Al 1992 jyly Asanáli Áshimov túsirgen "Qozy Kórpesh pen Baıan Sulý" kınokartınasy kórermenderge jol tartty. Shyǵys Qazaqstan oblysynyń Aıagóz aýdanynda Qozy Kórpesh pen Baıan Sulý kesenesi bar. Mazar "Qazaqstannyń kıeli jerleri" tizimine engen.