Búgin - Muqaǵalı Maqataevtyń týǵan kúni.
QR Memlekettik ortalyq mýzeıinde Bóltirik Atyhanuly atyndaǵy №36 gımnazıasy jáne Eńbekshi aýylyndaǵy orta mektep oqýshylarynyń qatysýymen Muqaǵalı Maqataevqa arnalǵan «Otanym, saǵan aıtamyn» ádebı-sazdy kesh ótti.
Sharaǵa arnaıy baǵdarlama, úlken daıyndyqpen kelgen Bóltirik Atyhanuly atyndaǵy №36 gımnazıasy jáne Eńbekshi aýylynyń orta mektep oqýshylary Muqaǵalı Maqataevtyń birneshe shyǵarmasyn naqyshyna keltirip, jatqa oqyp shyqty.
Aqynnyń týǵan jerine arnaǵan áserli jyrlary adam boıyna ulttyq rýh, jan tazalyǵyn darytyp, bolashaqqa degen senimin arttyra túsetini sózsiz. Jasóspirimderdiń óleńge degen yntasy, mánerlep oqý sheberligi, izdenimpazdyǵy kórermen qaýymnyń erekshe yqylasyna bólendi.
İs-sharany ashqan Ortalyq mýzeıi dırektorynyń jalpy máseleler jónindegi orynbasary Sarov Serjan Barahanuly «Ádebıetimiz úshin ǵana emes, tutas rýhanıatymyz úshin Muqaǵalı qazaq rýhanıatyndaǵy asa tanymal shyǵarmashyl tulǵalardyń biri. Aqyn murasy tunyp turǵan ónege, taǵylym. Aqyn jyrlarymen eń aldymen jastardy tárbıeleýimiz qajet», - dedi ol kirispe sózinde.
Eńbekshi aýylynyń orta mektep oqýshylary Muqaǵalı keshine aqyn óleńderiniń jelisimen daıyndaǵan «Aqqýlar uıyqtaǵanda» jáne «Muqaǵalı Maqataev» kórinisterin kópshilik nazaryna usyndy.
Eńbekshi aýyly mektep dırektorynyń oqý isi jónindegi orynbasary Ahmetova Gúljan «Muqaǵalı Maqataevtyń týǵan kúnin atap ótý mektebimizde dástúrge aınalǵan. Jyl saıyn ádebı keshter ótkizý, óleńderin jatqa oqý, ánderin shyrqap óner kórsetýde oqýshylarymyz erekshe belsendilik tanytady. Ortalyq mýzeıde kópshilik nazaryna ónerlerin usynýy balalardyń shabytyn, eline, jerine, tiline degen súıispenshilikterin arttyra túsetini anyq», - dedi.
Ádebı keshtiń qurmetti qonaqtary Almaty qalasynyń Qurmetti azamaty, «Dostyq», «Parasat», «Qurmet» ordeniniń ıegeri, til janashyry, Qazaqstannyń eńbek sińirgen qaıratkeri Asyly Ospan jáne Qazaqstannyń Eńbek sińirgen qaıratkeri, Halyqaralyq Muqaǵalı Maqataev atyndaǵy syılyǵynyń, halyqaralyq Mahambet syılyǵynyń ıegeri, Bilim berý isiniń úzdigi Gúlshara Esetqyzy mektep ustazdaryna úlken rızashylyq, alǵys sózderin jetkizdi.
Sharany Muqaǵalı jyrlaryna jazylǵan ádemi ándermen árlep, ónerimen kópshilikti tánti etken respýblıkalyq Muqaǵalı Maqataev baıqaýynyń júldegeri Sıazbek Órtqalıev, respýblıkalyq «Aqberen» baıqaýnyń júldegeri Fatıma Ábeteı, qalalyq «Bala fest» baıqaýynyń bas júldegeri Kenjebek Abdrahman boldy.