Medısına salasyna bólingen qarajatty tıimdi ıgerýge erekshe nazar aýdarý qajet. Bul týraly «Jibek Joly» telearnasynyń «Ýáde» baǵdarlamasyna bergen suhbatynda Densaýlyq saqtaý mınıstri Aqmaral Álnazarova málim etti, dep habarlaıdy aqshamnews.kz
- Qazirgi kezde Prezıdenttiń tapsyrmalaryn oryndaý turǵysynda MÁMS júıesin jetildirý, jergilikti atqarýshy organdardyń halyqtyń densaýlyǵyna qatysty jaýapkershiligin kóterý máselesi zań jobasynda qamtylǵan. Bul qujatta halyqqa medısınalyq qyzmettiń qoljetimdigin arttyrý máselesi qarastyrylǵan, - dedi A.Álnazarova.
Onyń aıtýynsha, Prezdenttiń saılaýaldy baǵdarlamasynda medısına salasyna bólinetin qarajattyń kólemin arttyrý qarastyryldy. Bul rette ınfraqurylymdy, jańa ǵımarattardy salýǵa, medısınalyq qyzmetterdiń sapasyn arttyrý úshin jańa tehnologıalardy engizýge qomaqty qarajat kerek.
- Atalǵan zań aıasynda salaǵa bólinetin qarajatty kóbeıtý josparlanǵan. Ekinshiden, bólingen qarajatty tıimdi ıgerýge erekshe nazar aýdarý qajet. Qazirgi kezde memleket jaǵynan bólingen qarajatty jáne jumys berýshilerdiń jarnasyn esepke alsaq, 2,8 trln teńgege jetip otyr. Bul da az aqsha emes. Osy qarajattyń belgili bir bóligi tıimsiz jumsalyp otyrǵanyn kórip otyrmyz. Iaǵnı halyq MÁMS júıesine tólemder aýdarylǵanymen, medısınalyq uıymdarda kezek máselesi áli de bar ekenin aıtyp jatady. Biz 2024 jyly bólingen qarajattyń tıimdiligin arttyrý baǵytynda jumystardy atqardyq, - dedi vedomstvo basshysy.
Sonymen qatar ol birneshe jyldan beri saladaǵy tarıf máselesi aıtylyp kele jatqanyn eske saldy. 2020 jyldan bastap kredıtorlyq qaryz degen másele paıda boldy. Bul turǵyda medısınalyq mekemeler kredıtorlyq qaryzdy kóbeıtip aldy. Osynyń saldarynan bul bereshek jyldan-jylǵa kóship jatady.
– Negizgi sebebi – ol tarıfterdiń tómendigi. Iaǵnı, tarıfter naqty medısınalyq qyzmetke jumsalyp jatqan qarajatty ótemeýi saldarynan osyndaı qaryzdar ósip jatyr. Joǵaryda aıtqandaı, bólingen qarjyny tıimsiz ıgerý máselesi bar. Sondyqtan osy eki baǵytta 2024 jyly Densaýlyq saqtaý mınıstrligi óziniń jumysyn uıymdastyrdy. 10 jyldan beri tarıfter kóterilmegen. Ana men balaǵa medısınalyq qyzmetterdiń tarıfterin kóbeıtýge alǵashqy qadam jasadyq. Jarty jyldyń ishinde bastapqy nátıjelerin kórip otyrmyz. Atap aıtqanda, qarjylyq jaǵdaımen qatar, medısınalyq qyzmettiń sapasy jaqsarǵany baıqaldy. Perzenthanalarda nárestelerdiń shetineýi azaıǵany tirkeldi. Sondyqtan bıyl bul baǵyttaǵy nátıjeler taǵy jaqsara túsedi dep úmittenip otyrmyz, - dedi mınıstr.
Aqmaral Álnazarovanyń sózine qaraǵanda, byltyr ana ólim-jitimi ortasha eseppen 13 paıyzǵa tómendegen. Buǵan saladaǵy baqylaýdyń kúsheıtilýi, aýrýhanalardaǵy em-dom hattamasyn jetildirý qadamdary, tarıfterdiń ósýi, kadrlardyń bilimin shyńdaý jumystary, medısınalyq uıymdardyń materıaldyq-tehnıkalyq jabdyqtalýyn kóterý yqpal etti.
Mınıstr mindetti áleýmettik medısınalyq saqtandyrý júıesi qazir álemde óziniń qajet ekenin dáleldegen tetikterdiń biri ekenin atap ótti.
- Damyǵan elderde MÁMS júıesi bar. Biz 2020 jyly ǵana engizdik. Sondyqtan bul júıe engizilgen kezeńde, oǵan koronavırýs pandemıasy problemasy qosyldy. Pandemıa kezinde tıisti qarajattyń qajet bolýyna baılanysty zańdarǵa birneshe ózgeris engizildi. Jalpy, MÁMS júıesin saqtap qalýymyz kerek. Biraq ony jetildire túsemiz, - dedi vedomstvo basshysy.