BJT qala turǵyndary úshin 1 aılyq eseptik kórsetkish, aýylda 0,5 AEK kóleminde belgilengen
2023 jyldyń 1 qańtarynan bastap mindetti áleýmettik medısınalyq saqtandyrýǵa tólenetin jarnalar men aýdarymdar mólsheri ózgerdi. Bıyl kim qansha jarna tóleıdi? Jarna kóleminiń ózgerýine ne túrtki boldy? Osy máselege qatysty suraqtarǵa Medısınalyq saqtandyrý qorynyń Almaty fılıaly dırektory Tileýhan Ábildaev jaýap berdi, dep habarlaıdy Almaty-akshamy.kz.
«2022-2024 jyldarǵa arnalǵan respýblıkalyq búdjet týraly» zańda eń tómengi jalaqy (ETJ) men aılyq eseptik kórsetkish (AEK) mólsheri belgilengen bolatyn. Ol boıynsha bıyl:
• Eń tómengi jalaqy – 70 000 teńge;
• Aılyq eseptik kórsetkish – 3 450 teńgeni qurap otyr.
Fılıal basshysy jarna tóleýshilerdiń birneshe sanatyn atap ótti. Birinshisi – memleket tarapynan saqtandyrylatyn 15 jeńildik sanaty. Oǵan balalar, zeınetkerler, UOS ardagerleri, barlyq toptaǵy múgedekter, «Altyn alqa», «Kúmis alqamen» marapattalǵan kóp balaly analar, jumys istemeıtin júkti áıelder, dekrette otyrǵan analar, múgedek bala kútimine baılanysty jumys istemeıtin azamattar, stýdentter t.b. kiredi. Jeńildik berilgen halyqtyń jalpy sany 11 mıllıonǵa jetip jyǵylady.
Atap aıtqanda, bıyl jumys berýshiler qaramaǵyndaǵy qyzmetkerler úshin burynǵysha, jalaqynyń 3% mólsherinde aýdarym jasaıdy.Tólemniń shekti mólsheri 10 ETJ nemese 21 myń teńgeden aspaıdy. Jumys berýshi aýdarymdy óz qaltasynan tóleıdi. Al, jumyskerler jalaqysynan 2% ustap Qorǵa aýdarady. Jarnanyń shekti mólsheri 10 ETJ nemese 12 myń teńgeden aspaýy tıis.
Odan keıingi sanat – jeke kásipkerler. Notarıýstar, jeke sot oryndaýshylary, advokattar da osy sanatqa kiredi. Olar burynǵysha 1,4 ETJ-nyń 5 prosentin tóleıdi. Bıyl eń tómengi jalaqynyń ósýine baılanysty bul soma 4 900 teńgege jetti.
Azamattyq-quqyqtyq kelisimshart boıynsha eńbek etetinder saqtandyrýǵa burynǵysha tabysynyń 2% aýdarady.
«Qazaqstanda ózin-ózi jumyspen qamtyǵan azamattar bar. Olardyń jalpy sany 1 mıllıonǵa jýyqtaıdy. Bul azamattar saqtandyrý júıesine qosylý úshin eki túrli ádisti paıdalansa bolady. Birinshisi – derbes tóleýshi retinde bir ETJ-nyń 5% nemese 3 500 teńge tóleý. Ekinshisi – biryńǵaı jıyntyq tólem tóleý. BJT qala turǵyndary úshin 1 aılyq eseptik kórsetkish, aýylda – 0,5 AEK kóleminde belgilengen. Bıyl 1 AEK 3450 teńgeni quraıdy», - dedi Tileýhan Ábildaev.
BJT tórt túrli mindetti tólemnen turady:
• Jeke tabys salyǵy;
• Memlekettik áleýmettik saqtandyrý qoryna tólenetin áleýmettik tólemder;
• Zeınetaqy jarnasy;
• MÁMS jarnasy.
Saqtandyrý júıesine qatysty tolyǵyraq málimetti 1406 biryńǵaı baılanys ortalyǵynan alýǵa bolady.