Almatyda «Mamluk.Sultan Beıbarys» atty qoıylym saýndrama janrynda kórermen nazaryna usynyldy.
Spektákl Qypshaq dalasynda týyp, Mysyrda el basqarǵan Sultan Beıbarys týraly syr shertedi. Jańa sahnalyq qoıylym tarıhta qalǵan tulǵanyń kóshbasshylyq, jaýyngerlik qabiletin kópke úlgi etedi. Erekshe qoıylym Sultan Beıbarystyń 800 jyldyǵyna oraı ázirlendi, dep habarlaıdy Almaty-akshamy.kz.
24.kz-tiń málimetinshe, janry saýndrama bolǵandyqtan birneshe baǵytty qamtıdy. Ózgesheligi etno-folklorlyq ansámbl men horeograftartarǵa basa nazar aýdaryldy. Oǵan qosa mýzykanttar, kompozıtor, aktórlar men dybys rejıserlary birigip jumys istedi.
«Erekshelikteri bar, sóz joq. Sózge qurylmaǵan bári saýnd-drama bolǵannan keıin, bári is-áreket pen mýzykaǵa qurylǵan. Bylaı aıtqanda, Sultan Beıbarys qalaı dúnıege keledi. Qalaı mamlúk kezinen, ol sultan boldy. Osy ómirinen bizdiń rejıserimiz Farhad Moldaǵalı taǵy da bir dúnıesin elge tartý eteıin dep jatyr», - deıdi Alataý dástúrli óner teatrynyń trýppa jetekshisi Sattar Erýbaev.
Óner ıeleri saýn-drama arqyly ulttyq fólklordy, qazaq ónerin, dala daýysyn, onyń áýenderin tabıǵı túrde tanytqysy kelgen. Qoıylymdy tamashalaǵan adam bir aýyz sózsiz-aq óner álemine enip ketedi.
«Bizdiń dala daýystaryn, ánshilerdiń jyrshylardyń, joqtaý, qanshama dalanyń kún kúrkireýinen bastap, adamdardyń sóz sóıleý ıntonasıalaryna deıin, adamdardyń osy jańaǵy mýzyka, plasıka sóz tynyshtyq, ulttyq aspaptar, osyndaı horeografıalyq dúnıeler sonyń barlyǵy bir jerge jınalǵan kezde osynyń barlyǵy arqyly biz saýnd-drama jasaı alamyz», - deıdi rejıser Farhad Moldaǵalı.
Teatr ujymy qoıylymǵa tarıhı drama retinde emes, zamanaýı spektákl retinde reńk bergen. Onyń búgingi kúnmen úndes bolýyn qalaǵan. Odan qazirgi qoǵamnyń kórinisin kórýge bolady.
«Beıbarystyń da óziniń ishki tragedıasy bolǵan qazaqtyń, qypshaqtyń dalasyndaǵy bir bala retinde emes. Beıbarys qazaq degen urandy bul jerden alyp tastadyq. Óıtkeni buǵan deıingi spektáklder solaı qoıylǵan. Ol qaıtadan qaıtalamaıyq degen nıetpen Beıbarysty álemdik tulǵa, retinde kórsetýge tyrystyq», - deıdi rejıser Farhad Moldaǵalı.
Qoıylym zamanaýı jańashyldyq pen rejıserlik utymdy sheshimderdi qoldana otyryp, Beıbarystyń adamı bolmysyn ashýdy maqsat etken. Oǵan teatrdyń 74 ártici, bıshiler toby jáne «Alataý» etno-folklorlyq ansambli atsalysty. Jańa qoıylym aldaǵy ýaqytta 4 halyqaralyq festıválge qatysady.