Kezdesýde 8 ınvestısıalyq kelisimshartqa qol qoıyldy
Búgin Ýfa qalasynda Premer-mınıstr Asqar Mamın Bashqurtstan basshysy Radıı Habırovpen kelissóz júrgizip, Qazaqstan-Bashqurtstan iskerlik forýmyna qatysty, dep habarlaıdy Almaty-akshamy.kz.
Taraptar Qazaqstan-Reseı strategıalyq seriktestigin odan ári tereńdetý turǵysynan ózara is-qımyldyń qazirgi jaı-kúıi men perspektıvalaryn talqylady.
Úkimet basshysy Qazaqstannyń Bashqurtstanmen saýda-ekonomıka, ınvestısıa, kólik-logıstıka, energetıka, AÓK, ónerkásiptik kooperasıa jáne basqa da salalardaǵy yntymaqtastyǵyn arttyrý úshin eleýli áleýettiń bar ekenin atap ótti.
Osy jyldyń 10 aıynyń qorytyndysy boıynsha QR men RF arasyndaǵy saýda kólemi 30%-ǵa artyp, $19,5 mlrd-qa jetti. Bul rette saýda qurylymyn ártaraptandyrýda ilgerileýshilik baıqalady — Qazaqstannyń eksport kólemi 39,4%-ǵa, onyń ishinde óńdelgen ónim kólemi 47,7%-ǵa ósti.
Bıylǵy qańtar-qazan aılarynda Qazaqstan men Bashqurtstan arasyndaǵy taýar aınalymynyń kólemi ótken jyldyń sáıkes kezeńimen salystyrǵanda 32,1%-ǵa ósip, $305 mln qurady. Bul kórsetkish pandemıaǵa deıingi deńgeıden 10,3%-ǵa joǵary. Aldaǵy jyldary taraptar taýar aınalymyn $1 mlrd deıin jetkizýge nıetti.
A. Mamın men R. Habırov Ýfa qalasynda ótip jatqan «Halyqaralyq bıznes aptalyǵy-2021» aıasynda «Qazaqstan – Bashqurtstan» iskerlik forýmyna qatysty. Forýmda 100-ge jýyq adam — memlekettik organdardyń, óńirlerdiń basshylary, sondaı-aq eki respýblıkanyń isker toptarynyń ókilderi bas qosty.
«Bashqurtstan Respýblıkasy Qazaqstan men Reseıdiń strategıalyq seriktestiginde erekshe oryn alady. Bıylǵy qyrkúıek aıynyń sońynda Radıı Habırovtyń QR-ǵa saparynyń qorytyndysy boıynsha bekitilgen Qazaqstan men Bashqurtstan arasyndaǵy ekijaqty yntymaqtastyqty damytý jónindegi 2022-2024 jyldarǵa arnalǵan Jol kartasy saýda-ekonomıkalyq jáne ınvestısıalyq ózara is-qımyldy arttyrýdyń senimdi tetigine, sondaı-aq bıznes-toptar úshin birqatar perspektıvaly salalarda qalyptasatyn múmkindikterdiń tereńdigi men uzaq merzimdiliginiń belgisine aınalýda», — dedi A. Mamın forýmda sóılegen sózinde.
Sondaı-aq Bashqurtstan Respýblıkasynyń Premer-Mınıstriniń birinshi orynbasary – ekonomıkalyq damý jáne ınvestısıalyq saıasat mınıstri R. Mýratov, Qazaqstan Respýblıkasynyń saýda jáne ıntegrasıa mınıstri Baqyt Sultanov, QR jáne BR iri bıznes ókilderi baıandama jasady.
Forým aıasynda hımıa jáne toqyma ónerkásibi, mashına jasaý, AÓK, sondaı-aq munaı-gaz salasyndaǵy konsaltıńtik qyzmetter salalarynda 8 ınvestısıalyq jáne komersıalyq kelisimshartqa qol qoıyldy.
Asa mańyzdy qujattardyń biri «Kaýstık» AQ men «Bashqurt soda kompanıasy» AQ arasynda birlesken kásiporyn qurý týraly qol qoıylǵan kelisim boldy. BK sheńberinde Qazaqstan men Reseı aýmaǵynda jalpy kólemi $1 mlrd deıingi jobalar iske asyrylatyn bolady. Kaýstıkalyq soda, natrıı gıpohlorıti, hlor, tuz qyshqyly, tıtan qostotyǵy jáne basqa da hımıalyq ónimder óndirisi qamtamasyz etiledi. Sonymen qatar TMD-daǵy jalǵyz sırkonıı oksıhlorıdiniń óndirisi jolǵa qoıylady.
Úkimet basshysy Ýfa qalasyna sapary barysynda Salavat Iýlaevtyń eskertkishine gúl shoqtaryn qoıyp, Bashqurtstannyń jobalyq basqarý jáne áleýmettik monıtorıń tájirıbesimen tanysty, sondaı-aq telekópir rejıminde Bashqurtstan Respýblıkasynyń joǵary oqý oryndarynda bilim alyp júrgen qazaqstandyq stýdenttermen áńgimelesti.
Jumys saparyna saýda jáne ıntegrasıa mınıstri Baqyt Sultanov, energetıka mınıstri Maǵzum Myrzaǵalıev, ekologıa, geologıa jáne tabıǵı resýrstar mınıstri Serikqalı Brekeshev, Aqtóbe oblysynyń ákimi Ońdasyn Orazalın, Batys Qazaqstan oblysynyń ákimi Ǵalı Esqalıev, isker toptar ókilderi jáne t. b. qatysty.