Bos oryndar sany 9,8%-ǵa, jumys izdeýshier sany 23,2%-ǵa tómendegen.
Qazaqstandyq mamandar mamyr aıynda eńbek naryǵynda qandaı ózgerister bolǵanyn baqylap, óz qorytyndylaryn shyǵardy. Nátıjesinde jumys berýshiler arasynda da, jumys izdeýshiler tarapynan da ekonomıkalyq belsendiliktiń tómendegenin baıqaǵan, dep habarlaıdy Almaty-akshamy.kz.
«2022 jylǵy mamyrda Elektrondyq eńbek bırjasynda 82,4 myń bos jumys orny jáne 45,7 myń túıindeme ornalastyryldy. Ótken aımen salystyrǵanda bos oryndar sany 9,8%-ǵa, al ózekti túıindemeler sany 23,2%-ǵa tómendedi», - delingen Eńbekmıni baspasóz qyzmetiniń habarlamasynda.
Sońǵy aıdyń qorytyndysy boıynsha, eńbek naryǵyndaǵy suranys pen usynystyń qurylymy ortasha bilikti mamandarǵa joǵary suranysty kórsetti, ıaǵnı suranys (50,8%) usynystan (35,5%) 1,4 ese asyp tústi. Alaıda, aǵymdaǵy jyldyń basynan beri baıqalǵan eńbek naryǵynyń qajettilikteri men biliktiligi tómen kadrlardyń bolýy arasyndaǵy teńgerimsizdik kúsheıdi – biliktiligi tómen eńbekke izdenýshiler ornalastyrylǵan bos jumys oryndaryna (40,2%) qaraǵanda 1,5 ese kóp (28,4%). Aıta ketý kerek, joǵary bilikti mamandar tarapynan eńbek usynysy (24,3%) suranysqa sáıkes keledi (20,9%).
«Mamyr aıynda júrgizýshiler (3,9 myń bos oryn) jáne kúzetshiler (1,9 myń bos oryn) eń kóp suranysqa ıe boldy. Sonymen qatar, medısına qyzmetkerlerine, atap aıtqanda dárigerlerge (2,5 myń bos jumys orny jáne 857 túıindeme), orta medısına qyzmetkerlerine (1,9 myń bos jumys orny jáne 774 túıindeme) jáne sanıtarlarǵa (1 myń bos jumys orny jáne 327 túıindeme) degen úlken qajettilikti atap ótý qajet», – dep habarlady «Eńbek resýrstaryn damytý ortalyǵy» AQ Ctrategıa departamenti dırektorynyń orynbasary Ulpan Shegenova.