Qazaqstan polısıasyna – 30 jyl
Qazaq topyraǵynda, qazaqy ortada ósip-óngen, qazaqtaı eldiń darhandyǵy men qonaqjaılylyǵyn boıyna sińirgen Mýstafaev Anar Mehtı-ogly qazaqsha maqaldatyp sóılegende, áriptesteriniń ózi tańdanysyp qalady.
Almaty qalasy Qylmystyq ataqarý júıesi departamentine qarasty LA-155/6 mekemesinde qyzmet etip júrgen Anar Mehtı-ogly Grýzıa jerinde kindik qany tamǵan, ulty – ázirbaıjan, anasy – qazaq.
Almaty qalasyndaǵy joǵary oqý ornynda oqyp, zańtaný mamandyǵyn jáne magıstratýrasyn bitirgen. Qazaq tilinde erkin sóıleıdi. Memlekettik tilmen baılanysty talaı jarysta top jarǵan azamat quqyq salasyndaǵy alǵashqy qyzmetin 2011 jyly Almaty oblysyna qarasty LA-155/18 mekemesinde rejım jáne kúzet bóliminiń baqylaýshysy bolyp bastaǵan. Odan soń jaýapkershiligi mol jas mamanǵa osy mekemedegi tárbıe bóliminde tárbıeshi-maman qyzmeti senip tapsyryldy. Bas bostandyǵynan aıyrylǵan, temir torda otyrǵan qylmysker adamdarmen til tabysý, olarmen túsinik jumystaryn júrgizý, durys jolǵa baǵyttaı bilý úshin de mamanǵa bilim, bilik, adamgershilik qasıetter kerek. Bul qyzmetten soń LA-155/6 kolonıasynda tárbıeshi jáne teolog boldy. Qazirgi kúni osy mekemede rejım jáne kúzet bóliminiń, mekeme bastyǵynyń kezekshi kómekshisiniń orynbasary bolyp, ádilet kapıtany sheninde qyzmet etýde.
Anar Mehtı-ogly óz bólimindegi qyzmetkerlerdiń árdaıym jınaqy, jiptikteı bolyp júrýine, naqty jumystardyń naqty nátıjesi bolýyna erekshe kóńil bóledi. Sol sebepti de búkil ujym aldynda bedeldi. Quqyq salasynda 11 jyldan astam tájirıbesi bar qyzmetker qylmystyq-atqarý júıesine jańadan kelgen mamandarǵa tálimger retinde árdaıym bilgenin úıretip, jol siltep, baǵyt-baǵdar kórsetip, qamqorlyq kórsetip otyrady.
Jaqsy adamnyń, jaqsy mamannyń eńbegi qashan da baǵalanady. Temirdeı tártipke tóselgen ádilet kapıtany minsiz eńbegi úshin, Qazaqstan polısıasynyń 30 jyldyq merekesine oraı qurmetti «Polısıa» medalimen marapattaldy.
İsine adal, ortasyna juǵymdy, Qazaqstan degen rýhty eldi qadirleıtin Anar Mýstafaev – úlgili otaǵasy. Jary ekeýi bir qyz, bir ul tárbıelep otyr.
Osyndaı mamandardyń jastarǵa úlgi bolary sózsiz.