Shara barysynda Aýǵanstanda óndirilgen 30 kılogramm geroın tárkilendi.
Ulttyq qaýipsizdik komıteti iri halyqaralyq esirtki sındıkatynyń zańsyz áreketiniń jolyn kesýge baǵyttalǵan kóp satyly halyqaralyq operasıany ázirlep, iske asyrdy, dep habarlaıdy Almaty-akshamy.kz.
«Bul qylmystyq top Taıaý Shyǵys pen Azıa azamattarynan turdy. Esirtki kontrabandasy arnasynyń baǵdary Aýǵanstannan bastaý alyp, odan ári Qazaqstan aýmaǵy arqyly júrgen, aqyrǵy baratyn jeri Nıderland bolǵan.Osy top áreketiniń aýqymdy geografıasyn eskere otyryp, UQK Nıderland Koróldiginiń quqyq qorǵaý organdarymen ózara is-qımyl uıymdastyrdy», - delingen UQK baspasóz qyzmetiniń habarlamasynda.
Operasıanyń tabysty iske asyrylýyna Ortalyq Azıa óńirlik esirtkige qarsy kúres jónindegi aqparattyq-úılestirý ortalyǵy men Qazaqstan Respýblıkasy Bas prokýratýrasynyń qarqyndy túrde járdem kórsetýi yqpal etti.
Birlesken jedel is-sharalar nátıjesinde halyqaralyq esirtki sındıkatynyń basty qatysýshylary anyqtaldy.
Nıderland aýmaǵynda baqylanatyn jetkizý barysynda kýrer ustalyp, odan Aýǵanstanda óndirilgen 30 kılogramm geroın tárkilendi.
Budan ári, Amsterdam qalasynyń quqyq qorǵaý organdary tintý barysynda iri esirtki plantasıasyn anyqtady.
Sarapshylardyń derekteri boıynsha, jetkiziletin elde alynǵan esirtki quraldarynyń quny 2 mln. AQSH dollaryn quraıdy.
Anyqtalǵan faktiler boıynsha Nıderland quqyq qorǵaý organdary sotqa deıingi tergeý júrgizýde.