Elimizde onlaın nesıe alý qıyndaýy múmkin.
Bul - Qarjy naryǵyn retteý jáne damytý agenttiginiń usynysy. Qashyqtan nesıe rásimdeý úshin, endi jeke kýálikten bólek, taǵy birneshe qujattar talap etilmek, dep habarlaıdy Almaty-akshamy.kz.
Stýdent Álibek Jandarov 3 jyl buryn alǵash ret onlaın nesıe alǵan. Qajet kezde jyldam rásimdelgen soń, onyń sany da kóbeıe bergen. Búgingi kúni 2 mln. teńgeden asa bereshegi bar. Tabysymnyń teń jartysy nesıe óteýge ketedi deıdi ol.
«Stýdentpin, qosymsha jumys isteımin. Basynda 20 myńnan bastap aldym. Keıin sany 50-100-200-ge deıin kete berdi. Táýeldilik kádimgi. Qıt etse júginesiń. Tabysym 150 myń, sonyń 80 myńyn kredıt tóleımin. Men sıaqtylar óte kóp, dostarymnyń basynda da osyndaı problema», - deıdi stýdent Álibek Jandarov.
Ótken aıda Álibek sıaqty 2,5 mln qazaqstandyqtyń bas-basyna kredıt ilindi. Olar bankten jalpy sommasy 1,2 trln teńge qaryz alǵan. Bul buryn sońdy bolmaǵan rekordyq kórsetkish.
Halyq 130 mlrd teńgege avtonesıe rásimdese, 800 mlrd teńge kepilsiz tutynýshylyq nesıe alǵan. Negizinen Almaty – (380 myń adam) Astana (216 myń adam) qalalary men Túrkistan – (210 myń adam) oblysynyń turǵyndary. Ekonomıser muny jaqsy úrdiske balap otyrǵan joq.
Osyny eskergen mamandar onlaın qaryzdyń talabyn kúsheıtýdi kózdeıdi.
Onlaın nesıe tipten ońaı, ári jyldam. Buqara onyń tıimdi ekenin aıtty. Aqsha kerek kezde, eshqaıda barmaı-aq, otyrǵan jerińizde saıtqa kirip kerekti qarajatty ala alasyz. Biraq bul múmkindikti alaıaqtarda paıdalanyp, qyzyǵyn kórip júr. Sondyqtan sarapshylar nesıe berý talaptary kúsheıtilgenin qoldaıdy.
«Endigi usynys, aldymen bıo sáıkestendirýden ótý kerek. Onyń elektrondy sıfrlyq qoltańbasy bolý kerek. Ártúrli faktordan ótip baryp ǵana, burynǵydaı 5-10 mınýt ǵana emes, ol 3-5 kúnge deıin artýy múmkin. Demek, bul adamdardyń nesıege degen psıhologıalyq kóz-qarasy ózgeredi», - dıdi sarapshy Baýyrjan Ysqaqov.