Mundaı jumystar 14 baǵyttaǵy joldarda júrgizilip otyrady.
Joldy jóndeýmen shuǵyldanatyn qazaqstandyq mamandar jyl saıyn jasaıtyn jumystary týraly aıtyp berdi, dep habarlaıdy Almaty-akshamy.kz.
«Elimizde respýblıkalyq mańyzy bar joldardy salý jáne jańartýmen qatar, paıda bolǵan shuńqyrlardy jóndeý jáne tegisteý sıaqty jumystar júıeli túrde jasalady», - delingen Indýstrıa jáne ınfraqurylymdyq damý mınıstrliginiń baspasóz qyzmetiniń habarlamasynda.
«Qazaqavtojol» kásiporny joldardy buzylýdan saqtaýǵa jáne qozǵalys qaýipsizdigin qamtamasyz etýge baǵyttalǵan keshendi baǵdarlama aıasynda 2021 jyly 658 myń sharshy metrge jýyq shuńqyr joldy jóndep, 189 myń sharshy metrge jýyq joldy tegistegen. Sonymen qatar, 11 myńnan astam jol belgisi, 480 aqparattyq panno, 35 jaryq dıodty jol belgisi jáne 757 metr kópir qorshaýy qoıyldy.
Sonymen qatar, 189 kólik pavılony men demalys alańy jóndelip, 4,9 myń sharshy metr dybys shyǵaratyn jolaqtar ornatyldy. Joldaǵy shaqyrymdy kórsetip turatyn 3547 belgi, 28 myńnan astam dabyl baǵany jáne 55 myńnan asa katafot qoıylǵan.
«Bul sharalardyń barlyǵy joldaǵy qaýipsizdikti qamtamasyz etip, apattyń azaıýyna jáne júrgizýshilerdiń zeıinin arttyrýǵa oń áser etedi. Aıtalyq, dybys shyǵaratyn jolaqtar kele jatqan qatardan shyǵyp ketkende nemese qaýipti ýchaskege jaqyndaǵanda, júrgizýshilerdiń nazaryn arttyrady. Jaryq dıodty katafottar men jol belgileri túngi ýaqytta baǵdar kórsetip otyrady», – deıdi jol mamandary.
Mamandardyń aıtýynsha, keshendi baǵdarlama aıasyndaǵy mundaı jumystar jyl saıyn respýblıkalyq mańyzy bar joldardyń 14 baǵytynda júrgiziledi.