Almatyda 6 myńǵa jýyq lıft bar.
Qazaqstan Lıftshiler ulttyq qaýymdastyǵynyń prezıdenti Erjan Igibaev Almatydaǵy jedelsatylardyń tehnıkalyq jaǵdaıyna baǵa berip, bul jabdyqty qanshalyqty jıi tekserip turý kerektigin aıtty, dep habarlaıdy Almaty-akshamy.kz QazAqparatqa silteme jasap.
«Búginde Almatyda 6 myńǵa jýyq lıft bar. Olardyń jaǵdaıyn qanaǵattanarlyq dep baǵalaýǵa bolady. 2019 jyldyń basynda qalada jańǵyrtýdy qajet etetin 1000-ǵa jýyq lıft bolǵan. Búginde bul san 300 lıftige deıin qysqardy. Olardy 2022 jyldyń sońyna deıin aýystyrý josparda bar. Biraq bul turaqty proses, óıtkeni ár lıftiniń óz qyzmet etý merzimi bar», - dedi Erjan Igibaev.
Onyń aıtýynsha, naryqta Qazaqstanda qoldanylatyn joǵary sapaly lıft brendteri óte kóp.
«Bul - Qytaı men Koreıadan shyqqan jedelsatylar. Sondaı-aq Reseı men Belarýs lıftisinen kem túspeıtin, qaýipsizdiktiń búkil standarttaryna saı keletin qazaqstandyq lıftiler de bar», - dep qosty spıker.
Sondaı-aq, qaýymdastyq basshysy, zańǵa sáıkes, lıftini jylyna keminde bir ret mamandandyrylǵan uıym tekseretinin atap ótti.
Bul rette qyzmet kórsetetin kompanıa aı saıyn lıft jabdyqtaryn tekserýden ótkizýge mindetti.
Erjan Igibaev Qazaqstannyń iri qalalarynda, atap aıtqanda, Almaty men Nur-Sultanda lıftterge qyzmet kórsetetin 60-tan 80-ge deıin kásiporyn bar ekenin, biraq olardyń bári birdeı sertıfıkattaýdan ótpegenin atap ótti.
Aıtýynsha, atalǵan uıymdarda ST-RK 3305-2018 ulttyq standartyna sáıkestik sertıfıkaty bolýy kerek.
Buǵan deıin ol Almatydaǵy «Mega Towers» turǵyn úı kesheninde 25-qabatqa deıin bar jyldamdyqpen kóterilip baryp, úıdiń tóbesine soǵylǵan lıftiniń tekserilgenin aıtqan bolatyn.