Kóktemgi aýa raıynyń tosyn syıy da bolýy múmkin.
«Qazgıdromet» RMK mamandarynyń boljaýynsha, kóktemde aýa temperatýrasynyń oń anomalıasy bar kúnder kóbirek bolady, dep habarlaıdy Almaty-akshamy,kz Turkystan.kz siteme jasap.
Atap aıtqanda, naýryzda aýanyń ortasha temperatýrasy respýblıkanyń basym bóliginde normadan 1-2°S joǵary, Batys Qazaqstan oblysynda, Atyraý oblysynyń soltústik-batysynda normaǵa jýyq bolady dep boljandy.
Al sáýir aıynda elimizdiń barlyq aýmaǵynda aýa temperatýrasy normadan 1°S joǵary bolmaq. Batys Qazaqstan oblysynda, Shyǵys Qazaqstan oblysynyń basym bóliginde, Almaty oblysynyń ońtústik-shyǵysynda norma shamasynda.
Alaıda, kóktemgi aýa raıynyń tosyn syıy da bolýy múmkin. Sebebi ótpeli maýsymda sınoptıkalyq prosester óte turaqsyz keledi. Osylaısha, sýyq aýa massasynyń aǵyny qarly boran týdyryp, soltústik aımaqtarǵa áser etýi múmkin. Arktıkalyq antısıklondardyń kirýimen ońtústik aımaqtarda da aıaz bolýy ǵajap emes.
Mamyrda elimizdiń basym bóliginde aýanyń ortasha aılyq temperatýrasy kóp jyldyq normaǵa jýyq bolady. Degenmen, birqatar oblystarda, ásirese, eldiń soltústik, ortalyq jáne shyǵys óńirlerinde mamyr kúnderi aýa temperatýrasy klımat normasynan 1°S tómen bolady. Buǵan Sibir aýdandarynan keletin sýyq aýa áser etpek.
Sınoptıkter naýryzda Qazaqstannyń basym bóliginde jaýyn-shashynnyń mólsheri normaǵa jýyq, al eldiń soltústik-batys bóliginde normadan artyq bolady dep boljaıdy.
Sáýirde jaýyn-shashyn mólsheri respýblıkanyń basym bóliginde, elimizdiń batysynda, qıyr soltústiginde, Shyǵys Qazaqstan jáne Almaty oblystarynyń ońtústik-shyǵys jartysynda, Túrkistan jáne Jambyl oblystarynyń taýly, taý bókterli aýdandarynda normadan az bolady.
Mamyrda Qazaqstannyń basym bóliginde jaýyn-shashyn mólsheri normaǵa jýyq bolady. Al Qyzylorda, Túrkistan, Qostanaı oblystarynyń basym bóliginde, Qaraǵandy oblysynyń batys jartysynda, Jambyl oblysynyń soltústik-batys jartysynda, Aqtóbe oblysynyń ońtústik-shyǵysynda normadan az bolady.