Almaty qalalyq polısıa departamentinde Qazaqstan Respýblıkasy Prezıdentiniń keńesshisi Málik Otarbaev pen Almaty qalalyq Qoǵamdyq damý basqarmasynyń basshysy Aıdar Esenbekov quqyq qorǵaý salasynyń ardagerleri men qyzmetkerlerimen júzdesti. Bul mańyzdy sharada Memleket basshysy Qasym-Jomart Toqaevtyń bastamasymen ótken IV Ulttyq quryltaıdyń negizgi ıdeıalary men tujyrymdary keńinen talqylandy. Bul týraly Aqshamnews.kz saıty habarlaıdy.
Málik Otarbaev óz sózinde Ulttyq quryltaıda qozǵalǵan máseleler – Qazaqstan halqynyń ortaq múddesine baǵyttalǵanyn erekshe atap ótti. Atap aıtqanda, azamattardyń ómir súrý sapasyn jaqsartý, óńirlerdi keshendi damytý, jastar tárbıesi men ulttyq sana – qazirgi memlekettik ıdeologıanyń basty basymdyqtaryna aınalyp otyrǵanyn jetkizdi.
Prezıdent keńesshisi quqyq qorǵaý salasy qyzmetkerleriniń el tynyshtyǵy men qaýipsizdigi jolyndaǵy eńbegin erekshe atap ótip, olardyń qoǵam aldyndaǵy jaýapkershiligin joǵary baǵalady.
Kezdesýde qalalyq İshki ister qyzmeti ardagerleri keńesi tóraǵasynyń orynbasary Baýyrjan Rahımov Ulttyq quryltaıda kóterilgen máselelerdiń mańyzyn aıta kele, bul bastamalardyń el birligin nyǵaıtýdaǵy rólin erekshe atady. Al Esirtkimen kúres basqarmasynyń jetekshisi Almaty qalasynda "Zań men tártip" qaǵıdattary aıasynda atqarylyp jatqan sharalar jóninde málimet berip, qylmyspen kúreste zamanaýı tásilder men tehnologıalardyń engizilip jatqanyn atap ótti.
Júzdesýdi qorytyndylaǵan Málik Otarbaev Almaty qalasynyń quqyq qorǵaý organdary qyzmetkerlerine Memleket basshysynyń ystyq sálemi men lebizin jetkizdi. Ol sóz arasynda qazaq halqyna «Qazaq» ataýynyń qaıtarylǵanyna bıyl 100 jyl tolǵanyn eske alyp, bul tarıhı oqıǵanyń mán-mańyzyna toqtaldy. Ult qaıratkerleri Sáken Seıfýllın, Sultanbek Qojanov, Turar Rysqulov syndy zıalylardyń el bolashaǵy úshin jasaǵan isterin úlgi etip, qazirgi urpaqty osy qasıetti ataýǵa laıyq bolýǵa úndedi.
Málik Otarbaev quqyq qorǵaý salasynyń qyzmeti qaýip-qaterge toly ekenin aıta otyryp, bul mamandyq – tek tártiptiń emes, erliktiń de sımvoly ekenin atap ótti. Jıyn sońynda ol sala qyzmetkerlerine aldaǵy ýaqytta da tabys pen tek bıikterden kórinýge tilektestik bildirdi.
Prezıdent keńesshisiniń bul kezdesýi – ulttyq ıdeologıanyń jergilikti deńgeıde júzege asyrylýyn qamtamasyz etýdegi naqty qadam. Quqyq qorǵaý organdary tek qaýipsizdik pen tártipti saqtaý emes, sonymen birge ulttyq birlik pen turaqtylyqty qamtamasyz etýdiń tiregi retinde baǵalandy. Jastar tárbıesi, qoǵamdyq qaýipsizdik pen zań ústemdigin nyǵaıtý – elimizdiń bolashaqqa nyq qadam basýyna jol ashady.