Malaızıa astanasy Kýala-Lýmpýrda H Azıa – Tynyq muhıty oıyndarynyń ashylý saltanaty ótti.
Sporttyq jarysqa álemniń 24 elinen 1300-ge jýyq estý qabileti zaqymdalǵan sportshylar qatysyp jatyr. Olar sporttyń 10 túrinen, atap aıtqanda, jeńil atletıka, taekvondo, dzúdo, erkin jáne grek-rım kúresi, ústel tenısi, badmınton, shahmat, boýlıń jáne fýtboldan ózara myqtyny anyqtaıdy, dep habarlaıdy aqshamnews.kz.
Qazaqstan quramasy sapynan bul jarysta 80 sportshy óner kórsetedi. Jerlesterimiz 8 sport túrinen synǵa túsýde: jeńil atletıka, taekvondo, dzúdo, erkin kúres, grek-rım kúresi, badmınton, shahmat jáne ústel tenısi.
«Qazaqstan quramasy Azıa – Tynyq muhıty oıyndaryna 1996 jyldan beri qatysyp keledi. Sportshylarymyz Almaty, Qaraǵandy, Shymkent, Ystyqkól jáne Bishkekte oqý-jattyǵý jıyndaryn ótkizip, jarysqa tyńǵylyqty daıyndyqpen keldi. Endi olardan joǵary nátıje kútemiz. Sportshylarymyzdyń tabysty óner kórsetip, el namysyn laıyqty qorǵaıtynyna senimdimin», – dedi Dene múmkindikteri shekteýli tulǵalarǵa arnalǵan sporttyq daıarlaý ortalyǵy sport basqarmasynyń basshysy Qaıratbek Seıtbekov.
Alǵashqy kúnniń jeńimpazdary
Qazaqstandyq sportshylar jarystyń alǵashqy kúninde-aq jeńis tuǵyrynan kórindi. Shahmattyń blıs túrinen:
• Áıelder arasynda Baljan Jumaǵazıeva 8 upaı jınap, Azıa – Tynyq muhıty oıyndarynyń chempıony atandy.
• Erler arasynda Samajan Kettebekov 8,5 upaı jınap, kúmis medal aldy.
Azıa – Tynyq muhıty oıyndary 8 jeltoqsanǵa deıin jalǵasady.