Qazaqstan Respýblıkasy Parlamenti Májilisiniń depýtaty Konstantın Avershın Ulttyq ulanynyń «Ońtústik» óńirlik qolbasshylyǵy men 5571 áskerı bólimine arnaıy issaparmen kelip, áskerı qurylymnyń tynys-tirshiligimen tanysty.
Kezdesý barysynda quqyqtyq tártip áskeriniń qyzmettik-jaýyngerlik mindetterdi oryndaý kezinde eleýli áser etetin birqatar máseleler aıtylyp, Ulttyq ulan áskeriniń tynys-tirshiligine qatysty qordalanǵan suraqtar talqylandy.
Odan soń halyq qalaýlysy óńirlik qolbasshylyqqa irgeles ornalasqan 5571 áskerı bóliminiń jaýyngerlik ázirligimen jáne olardyń úı-jaılary, turmys-tirshiligimen jaqyn tanysty. Sonymen qatar, bólimniń áskerı tehnıkasyn, atys qarýy men jeke quramnyń arnaıy jabdyqtaryn qarap ótti. Turmystyq úı-jaılardy, sarbazdar asqanasy men emdeý bólmeleri bar sanıtarlyq bólimderdi aralap, túıindi máselelerge kóńil aýdardy.
Sapar barysynda Májilis depýtaty qolbasshylyq tarapynan aıtylǵan máseleler basty nazarda bolatynyn, sheshimin tabýyna kúsh salatynyn jetkizdi. Sondaı-aq, quqyqtyq tártip áskeriniń jeke quramyna aldaǵy ýaqytta da ásker men memleketti nyǵaıtýǵa laıyqty úles qosatynyna senim bildirdi.
– El qaýipsizdigin qamtamasyz etý úshin tól áskerimizdiń áleýeti berik, shekarasy shegendeýli bolýy kerek. Búgingi kezdesýdiń qorytyndysy boıynsha áskerdiń jaýyngerlik ázirligin qamtamasyz etý, úı-jaılardy, áskerı tehnıkany, qarý-jaraqty jóndeý jónindegi problemalarmen tanystym. Árıne, olar birden sheshilmeıdi, biraq jan-jaqty kómek kórsetiledi. Máseleni bılikke jetkizip, oń sheshimin tabýǵa barynsha kúsh salamyz, – dedi K.Avershın.