Saılaý prosesi zaman talaptaryna saı jetilip keledi.
«Qazaqstan Respýblıkasynyń keıbir konstıtýsıalyq zańdaryna Memleket basshysynyń 2022 jylǵy 16 naýryzdaǵy Joldaýyn iske asyrý máseleleri boıynsha ózgerister men tolyqtyrýlar engizý týraly» Konstıtýsıalyq zań jobasyn birinshi oqylymda maquldady, dep habarlaıdy Almaty-akshamy.kz QazAqparatqa silteme jasap.
Sonymen qatar, palata depýtattary «Qazaqstan Respýblıkasynyń keıbir zańnamalyq aktilerine Memleket basshysynyń 2022 jylǵy 16 naýryzdaǵy Joldaýyn iske asyrý máseleleri boıynsha ózgerister men tolyqtyrýlar engizý týraly» zań jobasyn da birinshi oqylymda maquldady.
Konstıtýsıalyq Zańnyń jobasy 7 konstıtýsıalyq zańǵa túzetýler engizýdi kózdeıdi. Zańnyń jobasynda 51 zańǵa, onyń ishinde 15 kodekske túzetýler engizý qarastyrylǵan.
«Birinshiden, Prezıdentke qatysty túzetýler eskerilgen. Zań jobalary Prezıdenttiń jergilikti atqarýshy organdarǵa jáne Joǵarǵy Sot Keńesine qatysty jekelegen ókilettilikterdi, Senattaǵy «Prezıdenttik kvotany» qysqartý, sonymen qatar Prezıdent laýazymyn atqarý kezeńinde engiziletin jekelegen shekteýler boıynsha túzetýlerdi qamtıdy. Ekinshiden, Parlamenttiń qyzmetine, ıaǵnı Parlament palatalaryn qalyptastyrý tártibine qatysty túzetýler qamtylǵan. Saılaý júıesiniń aralas modeline kóshýine jáne Qazaqstan halqy Assambleıasynyń usynysy boıynsha «prezıdenttik kvotany» qoldaný tártibiniń ózgerýine baılanysty túzetýler osy zań jobalarynyń aıasynda qarastyrylǵan. Budan basqa, Konstıtýsıaǵa engizilgen túzetýlerge sáıkes, Parlamenttiń birqatar jańa ókilettikteri boıynsha túzetýler bar», - dedi QR Ádilet mınıstri Qanat Mýsın.
Budan bólek, Konstıtýsıaǵa engizilgen túzetýlerge sáıkes, endi Úkimetke zańdy kúshine engen ýaqytsha qaýlylardy qabyldaý boıynsha ókilettilikter beriledi. Mundaı aktiler aıryqsha bolyp sanalady. Osyndaı aktilerdi negizsiz qabyldaý táýekelderin azaıtý talaptary jáne basqa jaǵdaılar osy zań jobalarynda qarastyrylǵan.
«Kelesi túzetýler saılaý zańnamasyna qatysty. Demek, saılaý júıesiniń aralas modeline kóshýine baılanysty saılaýdy ótkizýdiń júıesi tolyǵymen qaıta qurylady. Saılaý prosesi zamannyń talaptaryna saı jetilip keledi. Depýtattyq mandatty keri qaıratyp alý jańa ınstıtýty engiziledi. Aýyl, jáne oblystyq mańyzy bar qalalarynyń ákimderin saılaý kezeń-kezeńimen engiziledi», - dedi vedomstvo basshysy.
Zań jobalarynda saıası partıalardy tirkeý tártipterine qatysty túzetýler qamtylǵan. Saıası partıalardy tirkeý úshin onyń sandyq mejesi 20 myńnan 5 myń adamǵa deıin, saıası partıalardyń aımaqtardaǵy ókildikteriniń sany 600-den 200-ge deıin, saıası partıany qurý kezindegi bastamashyl top azamattarynyń sany 1 myńnan 700-ge deıin qysqartylady.
«Jer jáne onyń qoınaýy, sý kózderi, ósimdikter men janýarlar dúnıesi, basqa da tabıǵı resýrstardy halyq menshigi dep taný boıynsha Konstıtýsıanyń 6-babyna qabyldanǵan naqty túzetýler engizý usynylady», - dedi Qanat Mýsın.
Budan buryn habarlanǵandaı, 2023 jyldan bastap qanatqaqty rejımde aýdandar men oblystyq mańyzy bar qalalar ákimderin saılaý ótkiziletin bolady.