Bul týraly Óńirlik komýnıkasıalar qyzmetiniń brıfıńinde Almaty qalasy eńbek ınspeksıasy basqarmasynyń basshysy Erkinbek Ámirǵalıev málimdedi.
Ol basqarma eńbek jaǵdaılary men jumysshylardyń jumys prosesinde qaýipsizdigi salasyndaǵy zańnama erejelerin, mysaly, jumys kúniniń uzaqtyǵy, jalaqy, eńbek qaýipsizdigi, balalar men jasóspirimderdiń eńbegin paıdalaný jáne basqa da osyndaı máseleler boıynsha erejelerdi qoldanýdy qamtamasyz etýmen aınalysatynyn eske saldy, dep habarlaıdy Almaty-akshamy.kz.
«Bizdiń basqarma zańdy tulǵa retinde Ádilet organdarynda aǵymdaǵy jyldyń 15 maýsymynda tirkeldi, degenmen eńbek qatynastary salasyndaǵy fýnksıalar buryn Almaty qalasynyń áleýmettik ál-aýqat basqarmasy sheńberinde ǵana júzege asyryldy. Eńbek ınspeksıasy basqarmasyn derbes memlekettik organ retinde bólý Qazaqstan Respýblıkasy ratıfıkasıalaǵan halyqaralyq sharttardyń normalarynan týyndaıdy, oǵan sáıkes eger eńbek ınspektorlaryna basqa fýnksıalar tapsyrylsa, onda sońǵylary olardyń negizgi fýnksıalaryn júzege asyrýǵa kedergi keltirmeýge jáne ınspektorlardyń kásipkerlermen jáne qyzmetkerlermen qatynastarynda qajetti bedeline nemese beıtaraptyǵyna qandaı da bir túrde nuqsan keltirmeýge tıis, ıaǵnı eńbek ınspeksıasynyń qyzmetinde múddeler qaqtyǵysyna jol berilmeıdi», - dep Erkinbek Ámirǵalıev jańa basqarý sebebin túsindirdi.
Jyl basynan basqarma qyzmetkerleri azamattardyń eńbek quqyqtaryn qorǵaýǵa baǵyttalǵan 320 jospardan tys tekserý júrgizdi. Tekserý barysynda eńbek zańnamasy normalarynyń 390 buzýshylyqtar anyqtaldy, zańdylyqty buzýshylyqty joıý týraly 220 nusqama berildi.
24,2 mln teńgege 179 zańdy tulǵa ákimshilik jaýapkershilikke tartyldy (86 zańdy tulǵanyń eńbek aqysyn ýaqtyly tólemegeni úshin 18 mln teńge tólendi). Jeke jáne zańdy tulǵalardyń 3 136 ótinishi qaraldy.
Jalaqy boıynsha 212 kásiporynda 300,8 mln teńgege bereshek óteldi, osylaısha 642 qyzmetkerdiń eńbek quqyqtary qorǵaldy.
Sondaı-aq ol jyl basynan beri óndirispen baılanysty 59 jazataıym oqıǵa tirkelgenin habarlady. Zardap shekkender sany – 70, onyń ishinde qaıtys bolǵany – 6 adam, aýyr dárejedegi jaraqat alǵandar –21 adam, jeńil dárejedegi jaraqat alǵandar – 43 adam.
Eńbek zańnamasynyń normalaryn túsindirý boıynsha qala kásiporyndarynda 2 236 adamnyń qatysýymen 87 kezdesý ótkizildi.