QR Parlament Májilisiniń depýtattary Palata otyrysynyń ekinshi oqylymynda memlekettik eńbek ınspeksıasyn ortalyq memlekettik organnyń qaramaǵyna berýdi kózdeıtin «Qazaqstan Respýblıkasynyń keıbir zańnamalyq aktilerine oıyn bıznesi, lotereıalar jáne lotereıa qyzmeti máseleleri boıynsha ózgerister men tolyqtyrýlar engizý týraly» zań jobasyn qarap, qabyldady.
Eńbek ınspeksıasyn jergilikti atqarýshy organdardan QR Eńbek jáne halyqty áleýmettik qorǵaý mınıstrliginiń qaramaǵyna berý nátıjesinde onyń aýmaqtyq bólimshelerimen memlekettik eńbek ınspeksıasynyń jeke vedomstvosy qurylatyn bolady, memlekettik baqylaýdyń tikeleı jáne táýelsiz júıesi quryldy jáne sol arqyly eńbek zańnamasynyń saqtalýyn baqylaý kúsheıtildi, dep habarlaıdy Almaty-akshamy.kz sala mınıstrligine silteme jasap.
Zań jáne kadr qyzmetin ortalyqtandyrý esebinen aýmaqtyq ınspeksıalar deńgeıinde tikeleı eńbek ınspektorlarynyń sany ulǵaıtylatyn bolady, bunyń ózi memlekettik qyzmetshiniń árbir jumys istep turǵan birliginen jumystyń úlken tıimdiligin beredi. Bul óz kezeginde qyzmetkerlerdiń quqyqtary men múddelerin qorǵaýdy, el kásiporyndaryndaǵy qaýipsiz eńbek jaǵdaılaryn qamtamasyz etýge, sondaı-aq eńbek daýlary men janjaldardyń týyndaý táýekelderin azaıtýǵa yqpal etetin bolady.
Bul rette ákimdikterde áleýmettik áriptestik pen áleýmettik jáne eńbek qatynastaryn retteý jónindegi úshjaqty komısıa sheńberinde áleýmettik dıalog júrgizý, jumys berýshilermen jáne kásipodaqtarmen ózara is-qımyl jasaý, ujymdyq eńbek daýlarynyń aldyn alý jónindegi fýnksıalar saqtalatyn bolady.
Esterińizge sala keteıik, memlekettik eńbek ınspeksıasyn jergilikti atqarýshy organdardan Eńbek jáne halyqty áleýmettik qorǵaý mınıstrligine berý máselesi Memleket basshysymen kelisilip, 2024 jylǵy 22 mamyrda Respýblıkalyq búdjet komısıasy qarady.