2023 jyldyń 17-21 shilde aralyǵynda Qazaqstan Respýblıkasy Parlamenti Májilisiniń Halyqaralyq ister, qorǵanys jáne qaýipsizdik komıtetiniń músheleri QR UQK Shekara akademıasynyń kýrsanttaryna arnalǵan lagerde bolyp, úsh kúnnen beri shekarashylardyń taýly daıyndyq sabaǵyna qatysty.
Májilis depýtattary M.Rojın, O.Qusbekov, B.Kerimbek jáne S.Nurtaza kýrsanttar men birge apta boıy olardyń tikken shatyrlarynda turdy. Osylaısha, bir sát aq kóılek gara galstýkterin shekarashy kıimine almastyrǵan depýtattar, taýly daıyndyq sabaqtaryna belsene aralasyp, 3954 metr bıiktiktegi «Pık-Týrıst» shyńyna shyqty, dep habarlaıdy Almaty-akshamy.kz.
Aıta ketý kerek, depýtatttardyń jazǵy damalysyn qıyp, oqý-jattyǵýǵa arnalǵan lagerlerge attanýyna turǵyndardan kelip túsken aryz, talaptar sebep bolǵan eken. Endi olar eki apta boıy kýrsanttar men sarbazdar arasynda júrip, saladaǵy problemalar men qordalanǵan máselelerdi anyqtap, olardyń sheshilýine sep bolatyn zań jobasyn, ázirleýge atsalyspaq.
Halyq qalaýlylarynyń aıtýynsha, Memlekettik shekaradaǵy shekarashylardyń jaı-kúıin Parlament kreslosynda otyryp talqylaǵannan kóri, olarmen birge turyp shekarashy keıipine enýdi jón kórgen. Iaǵnı, aýa-raıynyń ystyq-sýyǵyna qaramaı, taýly aımaqta erte turyp, taktıkalyq tapsyrmalar men jaýyngerlik daıyndyqtan ótken.
«Memleket - shekaradan bastalady. Kýrsanttardyń daıyndyǵy jaqsy eken. Otan ıgiligi úshin adal qyzmet etýge saqadaı saı ekenine kózimiz jetti. Biz munda taýly aımaqtaǵy shekarany qorǵaýdyń qyr-syryna qanyqtyq. Meniń oıymsha, bul óte kúrdeli de naǵyz erlerge laıyq jumys. Mundaı taýly daıyndyq sabaqtarynan kóp nárseni úırenýge bolady», - deıdi BAQ ókilderine bergen suqbatynda M.Rojın.
Shekarashy kýrsanttardyń taýly daıyndyq sabaqtary men qatar turmys-tirshiligin zerdelegen májilis depýtattary áskerı qyzmetshilermen áńgimelesip, materıaldyq-tehnıkalyq qamtamasyz etý, eńbek aqy jáne basqa da birqatar júıeli máselelerdi anyqtady.
Shekarashy kýrsanttardyń tynys-tirshiligin kózben kórip, kóńilge túıgen O.Qusbekov: «Tańatpastan erte oıaný, qolaıly jaǵdaıdyń máz emestigi osynyń bári búgingi shekarashylardyń jáı-kúıi. Bul sabyrlylyqqa, tózimdilikke tárbıeleıdi. Áskerı qyzmet – uldarymyzdy er-azamat qylyp tárbıeleıtin patrıottyq orta. Jaýapkershiliktiń, tártiptiń ne ekenin túsinýdiń jalǵyz joly», - deıdi.
Elordaǵa ár sarbaz ben ár sardardyń máselesin búge-shigesine deıin jetkizemiz dep otyrǵan májilismender shekarashylardyń turǵyn úı, áleýmettik qamsyzdandyrý jaǵyna da asa nazar aýdardy. Olardyń pikirinshe, ár zastava ekıpajsyz ushatyn ushaqtar men zamanaýı qarý-jaraqtar, jer talǵamaıtyn kóliktiń bolǵany durys eken.
Jıyn barysynda depýtattar ulttyq qaýipsizdik júıesin jetildirýge baǵyttalǵan jańa zańnamalyq bastamalar men sharalardy, jastardy otansúıgishtikke tárbıeleýdegi tásilderdi, shekarashylar sapynda qyzmet etý jaǵdaılaryn jaqsartý qajettiligin zerdeleýge erekshe nazar aýdardy.
Taýdaǵy shekarashy kýrsanttardyń jáı-kúıimen jaqynnan tanysyp bolǵan depýtattar Shekara akademıasyna kelip, ǵasyrǵa jýyq oqý ordasynyń tynys-tirshiligimen tanysty.
Munda depýtattardy Shekara akademıasynyń bastyǵy polkovnık P.Polıvanov qarsy alyp, májilis zalyna alyp kirdi. Akademıa basshylyǵy men bolǵan jınalysta taýdaǵy kórgen-bilgenderin ortaǵa salǵan depýtattar shekarashy mamandyǵynyń ońaı shaǵylatyn jańǵaq emes ekenine kózi jetkendeı.
Jınalys barysynda depýtattar Akademıa bastyǵyna kýrsanttardyń naǵyz shekarashy, Otanǵa qyzmetti - abyroıly mindet dep túsinetinin, aldaǵy ýaqytta óz isiniń maıtalman mamany bolyp shyǵatyndaryna senim bildirdi. Sodan keıin kózben kórip, kóńilge túıgen birqatar máselelerdi talqylaǵan májilis depýtattary odan ári Shekara akademıasynyń birneshe qurylymdyq bólimderine bas suqty.
Óz kezeginde kınologtar shekaralyq baqylaý kafedrasynda depýttardyń birine esirtki jasyryp, qyzmet ıtiniń kómegine júgindi. Ondaǵy maqsat - Memlekettik shekarada qyzmet ıtiniń taptyrmas dos, adamǵa adal serik ekenin kórsetý. Sýdaı jańa 3-arnaıy kafedrasynyń ákimshilik ǵımaratyndaǵy janǵa jaıly zamanaýı úlgide jabdyqtalǵan salqyn kabınetterdi aralap kórgen jumys toby, mundaǵy jańa zattar men aýladaǵy oqý korpýstaryna shyn máninde qatty qyzyǵýshylyq tanytty. Kafedra kabınetterin ózderiniń májilistegi kabınetterimen salystyrdy. Mundaǵy bólmelerdiń álde qaıda keń, ári jaryq jaqsy jabdyqtalǵanyn jasyrmady.
Akademıadaǵy kýrsanttar úshin jasalǵan osynshama jaǵdaı depýttardy beı-jaı qaldyrmady. Ásirese, «Boıng-747» maketi ornalasqan sımýlıatordaǵy ushaqtyń kánigi ushaqtan esh aıyrmashylyǵy joq ekenin tilge tıek etken depýtattar, shekarashy kýrsanttardyń myqty oqý bazasymen qamtamasyz etilgenin sóz etti.
Shara sońynda Qazaqstan Respýblıkasy Parlamenti Májilisiniń VIII shaqyrylymynyń Halyqaralyq ister, qorǵanys jáne qaýipsizdik komıtetiniń Tóraıymy Aıgúl Quspan áriptesteriniń jazǵy demalysqa qaramaı, bilekterin sybanyp jeldiń ótindegi shekara shebine attanyp ketkenin erekshe atap ótti.
Shekara akademıasynyń bastyǵy polkovnık P.Polıvanov depýtattardyń aldaǵy qyzmetine sáttilik tilep, taýly daıyndyq sabaqtarynan joǵary deńgeıde ótkeni týraly arnaıy sertıfıkat pen oqý ordasynyń tarıhynan syr shertetin qundy kitapty saltanatty túrde tabys etti.