Jer astyna túsip ketken eki qutqarýshynyń denesi tabylǵan joq
Adamdar mingen avtobýs shyńyraýǵa túsip ketken Maıqaıyń kentinde tótenshe jaǵdaı jarıalandy. Buǵan deıin óńirge qarasty Shanhaı shaǵynaýdanynyń azamattary «qutqarýshylardyń taǵdyryn qaıtalaımyz ba?» dep qorqatyn. El ýaıymyn estigender endigide opyrylyp ketken aýmaqqa jaqyn mańdaǵy turǵyn úılerdi tekserýdi bastaıdy, dep habarlaıdy almaty-akshamy.kz Almaty.tv-ge silteme jasap.
Al, jer qoınyna jutylyp, denesi áli tabylmaǵan qos qutqarýshynyń jaqyndary shyryl qaǵyp, taǵy da kombınatqa keldi. Qaıǵydan qan jutqandar izdeý jumysynyń toqtap qalǵanyna qapaly. «Apat bolǵaly arada 2 aıdan kóp ýaqyt ótse de, kompanıa basshylyǵy jubatý sóz, jóndi áreketke jarymady» degen olar izdeýsiz qalǵan qutqarýshylardyń denesin alyp, jer qoınyna tapsyrýǵa asyq.
«Maıqaıyń altyn» shahtasyndaǵy apat 4 qańtarda bolǵan. Eki aı izdeý jumystary júrgizilgenimen jer astyna túsip ketken eki qutqarýshynyń denesi sol kúıi tabylǵan joq. 36 jastaǵy Aıdos Shaımerden men 55 jastaǵy júrgizýshi Aıyp Tileýbergenovtiń týystary izdeý jumystaryn qaıta jalǵastyrýdy surap, zar jylaıdy.
– Bar tilegimiz – adam sıaqty jerlep, jer qoınaýyna tapsyrý. Erteń men onyń balalaryn qaı jerge aparamyn? «Ákem qaı jerde jatyr?» dep suraıdy. Topyraqtyń astynda qaldy deımin be? Qaı topyraqtyń astynda qalǵanyn da bilmeımiz. Balalaryna ne dep aıtamyn? Sol úshin baýyrymnyń súıegin alyp berýdi talap etemin, – dedi Aıdos Shaımerdenniń týysy Aıtjan Qaıkına.
Aqpanda ken baıytý kombınaty birese toqtap, keıin qaıta jumysyn bastaǵan. Buǵan sebep, qordaǵy altyn rýdasynyń taýsylýy boldy. Jer astyndaǵy topyraqtyń opyrylý qaýpi joǵary bolǵandyqtan arnaıy komısıa izdeý sharalaryn da ýaqytsha toqtatyp edi. Biraq qara jamylǵan azamattar jumystyń jalǵaspaýyna qaýip emes, qarajat kedergi bolýy múmkin dep sekemdenip otyr.
– 60 kúnnen asyp ketti. Eshqandaı jumysyna rıza emespiz, jarty jolda toqtatyp tastady. Mundaı jumys qanaǵattandyrmaıdy. Ne sebepti? Bizge qaǵaz júzinde kórsetsin, – dedi Aıyp Tileýbergenovtyń týysy Amanjol Tileýbergenov.
Qutqarýshylardyń týystary apat bolǵaly kombınat aldyn kún saıyn kúzetedi. Qaıǵydan qan jutqan azamattarǵa basý aıtýǵa da jaramaǵan kombınat basshylyǵy áreń jaýap berdi.
– Aqsha bar, biraq ol qarjy kásiporyndy iske qosý men ary qaraıǵy jumysqa arnalǵan. Apat orny áli de qaýipti aımaq dep sanalady, sondyqtan ol jerde jumys júrgize almaı otyrmyz. Basqalardyń ómirin qaterge tige almadyq, – dedi «Maıqaıyńaltyn» AQ dırektory Qýanysh Botın.
Aıdos Shaımerden men Aıyp Tileýbergenovtiń denesin izdeý jumysy qashan bastalatyny ázirge belgisiz. Tótenshelikter mundaı jumystar komısıa sheshiminen keıin ǵana belgili bolatynyn aıtty.
– Zań bar, ekinshiden, normatıvti quqyqtyq aktiler bar. Sodan keıin ereje bar. Marqumdardyń otbasynyń muńyna da alańdap otyrmyz. Adamgershilikti umytpadyq. Qaýipsiz dese, izdeýdi jalǵastyramyz, – dedi oblystyq Tótenshe jaǵdaılar departamentiniń bastyǵy Jasulan Jumashev.
Úmiti úzilmegen qos qutqarýshynyń týystary kompanıa basshylyǵynyń sheshimin kútýmen kún ótkizip jatyr. Ardaqty azamattarynyń denesin alyp, ata dástúrmen jer qoınyna tapsyrý – olardyń áýelgi armanyna aınalǵan.