Aýyr tehnıkanyń kómegimen ótkeldi tereńdetý jumystary jalǵasýda.
QR TJM málimetinshe, barlyǵy 37 myńnan astam tekshe metr topyraq pen taý jynystary shyǵaryldy, dep habarlaıdy Almaty-akshamy.kz.
Jumysta geoskaner qoldanylýda. Onyń kómegimen 7 qańtarda 5 metr tereńdikte topyraq astynan avtobýstyń yqtımal ornalasý orny anyqtaldy.
8 qańtarda topyraqty qaıta skanerleý júrgizildi. Onyń nátıjeleri boıynsha izdeý-qutqarý jumystarynyń barysyna túzetý engiziletin bolady.
Oqıǵa ornyna TJM, KÁAQQ ROSH, jergilikti atqarýshy organdar, «Maıqaıyńaltyn» AQ, polısıa jáne jedel járdem bólimshelerinen barlyǵy 139 adam jáne 47 birlik tehnıka jumyldyryldy.
Jazataıym oqıǵanyń sebepterin tergeý maqsatynda QR TJM Ónerkásiptik qaýipsizdik komıteti tóraǵasynyń orynbasary Musa Tanabaevtyń tóraǵalyǵymen komısıa jumys júrgizýde.
Komısıa quramyna Pavlodar oblysy ákiminiń birinshi orynbasary Serik Batyrǵujınov, «Maıqaıyńaltyn» AQ bas dırektory Qýanysh Botın, ónerkásiptik qaýipsizdik komıteti departamentiniń, eńbek basqarmasynyń, KÁAQQ ROSH, kásipodaq uıymynyń basshylary men mamandary kirdi.
Obektıvti tergeýdi uıymdastyrý jáne jazataıym oqıǵanyń sebepterin anyqtaý úshin tórt saraptama uıymynyń ókilderi tartyldy.