Ardagerge orkestrmen erekshe qurmet kórsetti
Almaty qalasy Qazaqstan halqy Assambleıasy Uly Jeńistiń 80 jyldyǵyna oraı 99 jastaǵy Uly Otan soǵysynyń ardageri Anatolıı Popovty arnaıy baryp quttyqtady.
Ashyq aspan astynda ótken saltanatty is-sharada QR UQK Shekara qyzmeti Almaty shekara akademıasynyń úrmeli aspaptar orkestri Jeńis kúnine arnalǵan mýzykalyq kompozısıalar oryndady.
Mádenı sharany Qazaqstan halqy Assambleıasynyń 30 jyldyǵy aıasynda Almaty qalasy QHA aqsaqaldar keńesi men «Jomart jan» ortalyǵy uıymdastyrdy.
Ardagerge qurmet kórsetý rásimine QHA aqsaqaldar keńesiniń tóraǵasy Bolat Ospanov, uıǵyr etnomádenı ortalyǵynyń tóraǵasy, QHA keńesiniń múshesi Abdýhalıl Dolkýntaı, sondaı-aq ardagerdiń balalary, nemereleri men shóbereleri qatysty.
Kópqabatty úı aýlasynda ótken sharany kórshileri balkondardan baqylap, qol soǵyp, shyn júrekten alǵys bildirdi. Anatolıı Popovqa gúl shoqtary men syı-sıapattar tabystaldy.
Anatolıı Popov 1926 jyly 13 qańtarda Qaskeleń qalasynda dúnıege kelgen. 1943 jyly áskerı baılanysshy bolyp 2-Prıbaltıka maıdanyna jiberiledi. Rıgany azat etý operasıasyna qatysyp, «Rıgany azat etkeni úshin», «Germanıany jeńgeni úshin» medaldarymen marapattalǵan. Soǵystan soń Saratov áskerı-medısınalyq ýchılıshesin támamdap, Germanıada bes jyl feldsher qyzmetin atqarǵan. Keıin Almatydaǵy sanıtarlyq-epıdemıologıalyq qyzmette 30 jyldan asa eńbek etti. Eki qyz ósirip, búginde 4 nemere men 6 shóbereniń ardaqty atasy.
Taqyrypqa oraı:
Abdýhalıl DOLKÝNTAI, «Jomart jan» ortalyǵynyń jetekshisi:
«Ardagerlerge taǵzym – bizdiń azamattyq boryshymyz. Anatolıı Nazaruly sekildi atalarymyzdyń arqasynda búgin beıbit ómir súrip otyrmyz. Qan keship kelgen sol býynnyń erligi – jastarǵa úlgi. Biz ardagerlerimizdi umytpaýǵa, qadirleýge mindettimiz. Qazaqstanymyz aman, elimiz tynysh bolsyn!»
Bolat OSPANOV, Almaty qalasy QHA aqsaqaldar keńesi tóraǵasynyń orynbasary:
«Anatolıı Popov – urpaqqa úlgi bolatyn batyr. Biz Assambleıa aıasynda jastarmen jıi kezdesip, osyndaı taǵylymdy júzdesýler arqyly tarıhı sanany jańǵyrtyp kelemiz. Qalamyzda aqsaqaldar keńesi men «Jomart jan» jobasy birlesip, júıeli jumys júrgizip otyr. Bul shara – sonyń jarqyn dáleli.
Margarıta KIRILOVNA, shóberesi:
«Men atamdy óte jaqsy kóremin. Ol bizge soǵys týraly kóp áńgime aıtyp berdi. Qorqynyshty bolǵan eken. Jeńis úshin atamyzǵa myń alǵys! Osyndaı beıbit ómir syılaǵan ardagerlerge biz árdaıym rızamyz. Atam – bizdiń maqtanyshymyz!