Sheteldik bir top zertteýshi-sarapshy 4–8 jas aralyǵyndaǵy balalarǵa «Mahabbat degen ne?» degen saýal tastaıdy. Sonda órenderdiń bergen jaýaptary úlkender kútkendeginen áldeqaıda tereń maǵynaly bolyp shyqqan.
Rebekka, 8 jasta:
«Meniń apam artrıtpen aýyrǵanda, ózdiginen eńkeıip, tipti aıaǵynyń tyrnaqtaryn boıaı almaı qaldy. Sonda atam ózi de artrıtpen aýyryp turǵanyna qaramastan apamnyń tyrnaǵyn ylǵı boıap beredi. Mundaıdy mahabbat deıdi».
Bıllı, 4 jas:
«Seni bireý jaqsy kóretin bolsa, onda onyń seniń atyńdy aıtqandaǵy daýysy basqasha shyǵady. Sonda ózińniń esimińniń onyń aýzynyń ishinde, qaýipsiz jerde ekendigin bilesiń».
Karen, 7-de:
«Eger sen bireýdi súıseń, onda kirpikteriń bir kóterilip, bir túsedi. Sonda senen kip-kishkentaı juldyzshalar ushyp shyǵady».
Krıssı, 6-da:
«Mahabbat degendi, máselen, bir jerge tamaqtanýǵa barǵanyńda, bireýge qýyrylǵan kartobyńnyń kóp bóligin onyń ornyna birdeńe dámetpeı-aq berý dep bilemin».
Loren, 4 jasta:
«Meni ápkemniń jaqsy kóretinin bilemin. Sebebi, ol barlyq burynǵy kıimderin maǵan beredi de, amalsyzdan ózine jańa kıimder satyp alýǵa dúkenge ketedi».
Noel, 7 jasta:
«Eger sen bir ulǵa onyń jeıdesiniń unaıtyndyǵyn aıtsań, sosyn ol sol kıimdi kúnde ústinen tastamaı kıip júrse, sol mahabbat».
Merı, 4-te:
«Mahabbat degenimiz – eger sen tańerteń kúshigińdi ózińmen birge ertpeı, tańnan keshke deıin úıde jalǵyz qaldyryp ketseń, sony da elemeı, onyń júgirip kelip betińdi jalaýy».
Sındı, 8 jas:
«Fortepıano konsertinde sahnaǵa shyqqanymda qatty qoryqtym. Zaldaǵy adamdardyń bárine qarap turǵanymda, maǵan qolyn bulǵap, jymıyp otyrǵan ákemdi kózim shaldy. Búkil zalda maǵan solaı istegen tek ákem ǵana boldy. Sodan soń múldem qoryqpadym».
Dennı, 7 jasar:
«Anam ákeme arnap kofe ázirlegende, onyń dámdiligine kóz jetkizý úshin aldymen ózi birinshi bolyp iship kórýi, mine, mahabbat degenimiz sol».
***
Bala degen – eń adal, kirshiksiz tulǵa. Ol oıyndaǵysyn búkpesiz, sol qalpynda jetkize biletin jalǵyz taza adam. Birde jazýshy jáne lektor Leo Býskalá ózi qazylyq etken bir baıqaý týraly qyzyqty jaıtty aıtqan eken. Álgi baıqaýdyń maqsaty eń qamqor balany anyqtaý bolypty. Sonda «eń qamqor bala» mártebesin 4 jastaǵy baldyrǵan ıelenipti. Ol jýyrda ǵana kempiri qaıtys bolǵan qarıanyń eń kishkentaı kórshisi bolyp shyqty.
Uzaq jyl otasqan jary baqılyq bolyp, eńsesi túsip, eki ıyǵy qýshıyp, sopıyp, jalǵyzdan-jalǵyz kemseńdep jylap otyrǵan qartty kórgen álgi bala onyń aýlasyna ımenbeı kirip baryp, qarıanyń tizesine jaıǵasyp alyp, kózderi jypylyqtaǵan kúıi ún-túnsiz otyra bergen. Balaqaıdyń sheshesi ulynan:
– Balam, kórshi ataıǵa ne aıttyń? – dep suraǵanda, baldyrǵan:
– Eshteńe. Men tek atanyń jylap alýyna kómektestim, – degen eken.