nemese 14 aýyr operasıany bastan ótkergen Ánel men onyń barlyq aýyrtpalyǵyn birge kóterisken Marlen týraly.
Bizdiń Dımash Qudaıbergen kópke móldir mahabbat hıkaıasymen tanymal bolǵan Marlen men Áneldiń Dinmuhammed esimdi ulyna kindik áke boldy. Bul týraly erli-zaıypty jastar ózderiniń Instagram paraqshasynda ánshimen túsken sýretterin jarıalaı otyryp, qýana habarlady.
Qos ǵashyq
«Balamyzdyń kindik papasymen alǵashqy sýreti. Bizdiń Dımalóktiń kindik papasyna kóp rahmet! Dımash sıaqty el syılaıtyn jaqsy, adal jan bolsyn», – dep jazdy Ánel. Áleýmettik jeli qoldanýshylary da jas otbasyny quttyqtap, jyly lebizderin jetkizdi.
Iá, jaqynda Marlen men Áneldiń tuńǵyshy uly dúnıege kelip, sábıge Dinmuhammed degen esim bergen bolatyn. Endi Dımash kindik ákesi bolǵan bóbektiń ata-anasy kimder, soǵan az-maz toqtala keteıik.
Ánel men Marlendi eshkim umyta qoımaǵan bolar. Erekshe mahabbat ıeleri týraly oqyrmandarymyzǵa aıta otyraıyq.
Ánel Muratova mektepte júrgende syrqatqa shaldyǵady. Marlen Nurgasenov ekeýi bir mektepte oqyǵan. Eki jastyń dostyǵy mektep qabyrǵasynda bastalypty. Alǵashynda ekeýi telefonmen, ǵalamtor arqyly sóılesip júrgen. Keıin Marlen 9-synypty bitirip, Aqtóbege kolejge oqýǵa túsedi, al Ánel mektepte oqyp júredi.
Qyz 2009 jyly ókpesine salqyn tıgizip alyp, aýrýhanada uzaq jatady. Aýrýy meńdep, olar anasy ekeýi Aqtóbe qalasyna tekserilýge barady. Marlen bul týraly dosynan estip, qyzǵa keledi. Sol kezde ekeýi bir-birine jaqynyraq júrip, qalada qydyrady. Biraq Ánel oǵan óziniń aýrýy jóninde eshteńe aıtpaıdy. Marlen bolsa, ony Qulsaryǵa poıyzǵa shyǵaryp salady. Al bir jyldan soń Áneldiń bir ókpesin túgelimen alyp tastaý kerek bolǵan. Áneldiń anasy Qaraǵandynyń týmasy eken, ol qyzyn sonda ota jasatýǵa áketedi.
Tabandy jigit
Ánel Qaraǵandyǵa operasıaǵa ketip bara jatqanda, bir kún buryn jigitke telefonmen jaǵdaıyn aıtady. Ol nege ekeni belgisiz, qashan, qaı poıyzben shyǵatynyn surastyryp alady. Ánel mingen poıyz Aqtóbege soqpaıdy, Qandyaǵashqa toqtaıdy. Al Marlen sabaqtan qashyp shyǵyp, Aqtóbeden Qandyaǵashqa kelip, qyzdyń vagonyna otyryp alady. Ánel jigittiń bul áreketine qýanyp tursa da, «sabaǵyń qaıda?» dep suraıdy alańdap. «Sen operasıaǵa ketip bara jatqanda men qalaı sabaqta otyramyn?» – deıdi jigit. Árıne, qyzdyń anasy da buǵan tańqalady.
Qaraǵandyda Marlen Áneldiń janynda, aýrýhanada túnep júredi. Dárigerler oǵan palataǵa kirýge ruqsat bermese de, ol ebin taýyp kirip ketetin kórinedi. Túngi aýysymdaǵy medbıkelerge tátti torttar ákelip, olardyń da kóńilderin kóterip qoıady eken. Eń bastysy, únemi Áneldiń janynan tabylatyn. Ony moraldyq turǵyda qoldaıtyn. Marlen aýrýhanada Áneldiń janynda únemi bolý úshin syrttaı oqý bólimine aýysady. Keıin dárigerler «bul balany kóndire almaısyń báribir» dep, qoldaryn bir siltegen kórinedi.
Áneldiń ókpesin alyp tastaıdy. Kúnine 25 túrli dári-dármek qabyldaǵandyqtan, asqazan-ishek joldarynyń jumysy buzyla bastaıdy. Dárigerler ota jasaý kerek dep, 8 santımetr ishegin kesedi. Al 2012 jyly júregi syr bere bastaıdy. Tek bir ókpe jumys jasap turǵandyqtan, júrekke ottegi jetpeıdi. Kez kelgen ýaqytta aýa jetpeı qalýy múmkin bolǵasyn ottegi balonyn aldyrtady. Osy kezde Marlen Qaraǵandydan jumys tapqan bolatyn. Ol Áneldiń jaǵdaıyn estı sala, «men jumystan shyǵam, seniń qasyńda bolyp, balondy kóterip júremin» deıdi. Iá, Ánel ottegi balonynsyz júre almaıtyn boldy. Kez kelgen ýaqytta esinen tanyp qalatyn. Sol kezde de 10 kelilik ottegi balonyn kóterip, Marlen onyń janynda júrdi.
«Kúnim, sen sónbeshi!»
Únemi aýa jetpeı turǵasyn, Áneldiń júregi ornynan qozǵalyp, arqasyna qaraı yǵysyp ketedi. Qaraǵandyda ókpesine ota jasaǵan dáriger «jedel ota jasaý kerek, júrekti qalaı da ornyna ákelý kerek» ekenin eskertedi. Marlen men Ánel Astana men Almatynyń dárigerlerine barady. Sol kezde Almatyǵa Máskeýden kelgen profesor Áneldi tekserýden ótkizedi de, Marlenge «sen qyzdy ári-beri súırep, álsirete berme, ómir súrýge 30 paıyz ǵana múmkindigi bar, eshkim oǵan ota jasaý jaýapkershiligin almaıdy, áke-sheshesine apar, daıyndala bersin» degen «úkim» shyǵarady. Sonda Marlen qatty ashýlanyp, profesordyń jaǵasyna jarmasyp, «men Áneldi áli-aq sizdiń aldyńyzǵa sap-saý ákelem» dep aıqaılaǵan kórinedi. Sol kúni ekeýi saıabaqqa keledi. Marlen «Sen profesor osylaı aıtty eken dep berilesiń be? Soǵan senesiń be? Allaǵa nege senbeısiń? Qudaıdan nege suramaısyń? Men sen úshin ómir súrip júrmin, nege maǵan kómektespeısiń? Sen tek ishińnen jeńilmeshi, men seniń jazylatynyńa, tiri qalatynyńa tolyqtaı senem, tek sen óziń senbeı tursyń», – dep aıqaılap turyp jylaıdy.
Ánel kúızeliske túsip, tek dáriniń kómegimen uıyqtaıtyn halge jetedi. Birde túnde uıqysynan oıansa, Marlen Qudaıdan duǵa tilep: «Synap jatqanyńdy bilemin, biraq qatty synamashy, Áneldiń aýyrǵanyna shydaı almaımyn, jol kórsetshi» dep jalbarynyp otyr eken. Ony estigen Ánel jylap, bir túnde ál-kúsh jınap, óz-ózine senim arta bastaıdy.
2016 jyldyń aqpanynda Áneldiń júregine ota jasalý týraly sheshim qabyldandy. Biraq ota ústeline tek 30 paıyz ǵana kepildikpen jatady. Anasy: «Múmkin oılanarsyń, jasatpassyń, qorqyp turmyn», - dep jylasa, Marlen: «Joq, ota jasalady, men senemin, bári jaqsy bolady», - deıdi. Áneldiń ózi de: «Ólimdi kútip otyrǵansha, amal jasap ólgenim artyq», - dep sheshedi. Otany 3-4 saǵattan artyq sozýǵa bolmaıtyn edi, sebebi pasıent narkozdy kótere almaıdy. Biraq keıin belgili bolǵanyndaı, oǵan jasalǵan ota 6,5 saǵatqa sozylǵan. Táýekelge barǵan bilikti hırýrg shyǵa salyp, birden Marlendi izdep taýyp: «Ánel bárin jeńip shyqty, tiri qaldy», – degen eken mańdaıyndaǵy terin súrtip turyp. Sosyn basqa esh jaqqa burylmastan, óz kabınetine baryp, qoldaryn eki jaqqa sozyp, kreslosyna jata ketipti deıdi. Qatty qaljyraǵan, árıne.
Sábıdiń kindik ákesi – Dımash
Marlenniń qalaıda Áneldiń janynda bolý úshin Qaraǵandyda dalada túnegen kezderi de búginde kórgen tústeı. Ánel 16 jasynda qatty syrqattanyp, 7 jylǵa jýyq ómir men ólimniń arasynda bolǵanda, ony rıasyz súıispenshiligimen demeı bilgen Marlen mahabbaty týraly ǵalamtorda jıi jaza bastady. Ekeýine adamdardan hattar da aǵyla bastaıdy. Ekeýine baqyt tilegen nıettes hattardan kún qurǵamaǵan. Nekesin 2015 jyly Qaraǵandyda qıdyrtqan qos ǵashyq 2017 jyly Ernar Aıdardyń «Kúnim, sen sónbeshi» atty beınebaıanyna túsedi. Klıp úsh jylǵa jýyq ýaqyt ishinde YouTube jelisinde 32 mln qaralym jınaǵan.
Osynaý jas ǵumyrynda 14 aýyr otany eńsergen Ánel 10 jyldan soń sábı súıdi. «Alla bizge 10 jyl sabyrmen kútken sábıdi berdi. Iá, maǵan ońaı bolmady. Dárigerler «eshqashan ana bolmaısyń» dep neshe márte qoldaryn bir siltedi. Maǵan aýyr tıetin, jylaıtynmyn. Biraq eshqashan Alladan úmitimdi úzbedim. Kúndiz-túni janymda bolǵan, bir kún, bir tún de jalǵyz qaldyrmaǵan anam men Marlenime alǵysym sheksiz. Barlyq jaǵdaıymdy jasap, qıyn sátte janymnan tabylyp, qoldaý kórsetip, ár jylaǵan saıyn jasymdy súrtip, kúızeliske túsken saıyn shyǵarýǵa tyrysyp, balany túnimen qarap, qolynan kelgenniń barlyǵyn jasap júrdi. 10 jyl boıy menimen birge sabyr saqtap, bir sát betime baspaı, sońyna deıin Alladan duǵa surap, úmitin úzbegen Marlenge Rabbym sábı berdi», – degen jan tebirenterlik jazba qaldyrǵan bolatyn osydan bir aı shamasynda Ánel paraqshasynda. Sol sábıdiń kindik ákesi - Dımash Qudaıbergen!