1 qarashadan bastap magıstratýraǵa túsý úshin keshendi testileýge qatysý úshin ótinish qabyldaý bastaldy.
Tirkelý ǴJBM Ulttyq testileý ortalyǵynyń app.testcenter.kz saıtynda 18 qarashaǵa deıin júrgiziledi. Testileýdiń ózi 28 qarasha men 11 jeltoqsan aralyǵynda ótedi, dep habarlaıdy Almaty-akshamy.kz Elorda.info-ǵa silteme jasap.
Tirkelý kezinde túsýshi testileýdi tapsyrý qalasyn óz erkimen tańdaıdy. Úmitkerler ótinishterdi qabyldaý merzimi aıaqtalǵanǵa deıin (18 qarashaǵa deıin) bilim berý baǵdarlamalarynyń toby, tili jáne testileýdi tapsyrý orny boıynsha ótinishke ózgerister engize alady. Testileýdi ótkizý kúni týraly aqparat túsýshiniń jeke kabınetinde 22 qarashada qoljetimdi bolady.
«Keshendi testileý elektrondyq formatta ótkiziledi jáne úsh bólimnen turady: shet tili boıynsha test, oqýǵa daıyndyǵyn anyqtaýǵa arnalǵan test jáne bilim berý baǵdarlamalary tobynyń beıini boıynsha test. Barlyǵyna 3 saǵat 55 mınýt beriledi. Shet tilin meńgergenin rastaıtyn halyqaralyq sertıfıkattardyń biri bar oqýǵa túsýshiler shet tili boıynsha test tapsyrýdan bosatylady», – dep túsindirdi Ǵylym jáne joǵary bilim vıse-mınıstri Qýanysh Erǵalıev.
Bıyl ǵylymı-pedagogıkalyq magıstratýraǵa túsý úshin ótý 75 bal, beıindik magıstratýraǵa túsý úshin 50 bal jınaý qajet. Keshendi testileý nátıjelerimen kelispegen jaǵdaıda túsýshiler testileý aıaqtalǵannan keıin onlaın-apellásıaǵa bere alady.
Jazdaǵy testileýde erejeni buzǵany úshin testileýge jiberilmegen, sondaı-aq nátıjeleri joıylǵan tulǵalar keshendi testileýge qaıta qatysýǵa jiberilmeıtinin atap ótken jón.
Magıstratýraǵa túsýshiler 4 myńǵa jýyq memlekettik bilim grantyna úmitker bola alady.