Qazaqstanda magıstratýra men doktorantýraǵa qabyldaý talaptary ózgerdi. Bul jaıynda elimizdiń Bilim jáne ǵylym mınıstri Asqat Aımaǵambetov Facebook paraqshasynda málim etti, dep habarlaıdy almaty-akshamy.kz
«Joǵary oqý oryndarynyń qaýymdastyǵy men Rektorlar keńesi tamyz keńesiniń otyrysynda magıstratýra men doktorantýraǵa qabyldaýǵa qatysty usynystar engizgen bolatyn. Egjeı-tegjeıli talqylaýdan keıin biz qabyldaý erejelerine ózgerister engizý týraly sheshim qabyldadyq. Endi magıstratýra men doktorantýraǵa qabyldaý jylyna eki ret ótkiziledi. Iaǵnı, magıstratýra men doktorantýraǵa túsý emtıhandary dástúrli túrde tamyz aıynda jáne qosymsha jeltoqsan aıynda uıymdastyrylady. Osy norma 2021 jyly kúshine enedi dep josparlap otyrmyz», - dep jazady mınıstr.
Onyń aıtýynsha, osy maqsatta Ulttyq testileý ortalyǵynyń qyzmetkerleri keshendi testileý men túsý emtıhandaryn qosymsha uıymdastyrady. Qujattardy qabyldaý qarasha aıynda bastalady.
«Álbette, qujattary men emtıhandaryn tapsyrýǵa, qajetti sertıfıkattardy alýǵa úlgermegen azamattar úshin bul jaǵymdy jańalyq ekeni sózsiz. Jazǵy qabyldaý naýqany men ótkizilgen emtıhandardyń qorytyndysy boıynsha magıstratýra men doktorantýraǵa arnalǵan bilim berý granttarynyń artyq qalýyna baılanysty azamattar osy jyldyń jeltoqsan aıynda memlekettik granttardy ıelene alady. Daıyndyq baǵyttary bólinisinde granttardyń sany men qujattardy qabyldaýdyń naqty merzimderi týraly aqparat qosymsha jarıalanady», - dep túıindedi sózin Asqat Aımaǵambetov.