Prezıdent tapsyrmasy. Aıtyldy. Jasaldy.
Mádenıet jáne sport mınıstrligi Memleket basshysy tapsyrmalarynyń oryndalýy týraly esep berdi.
«Biz mádenıet salasynda jumys isteıtin azamattarǵa jetkilikti túrde kóńil bólmeı otyrmyz. Bul – eń aldymen, kitaphana, mýzeı, teatr qyzmetkerlerine qatysty másele. Úkimet mádenıet qyzmetkerleriniń eńbekaqysyn kóbeıtýi tıis», – dep Qasym-Jomart Toqaev óz Joldaýynda tapsyrma bergen bolatyn.
Mádenıet jáne sport mınıstrligi Prezıdent tapsyrmasy aıasynda kelesideı jumystar atqarylǵanyn habarlady:
- 2022 jyly mádenıet jáne arhıv isi qyzmetkerleriniń eńbekaqysy 23%-ǵa kóterildi.
- Bıyl jyl basynan sala qyzmetkerleriniń eńbekaqysy taǵy 22%-ǵa artty.
- Aldaǵy eki jylda mádenıet jáne arhıv isi qyzmetkerleriniń aılyǵy 55%-ǵa kóteriletin bolady.
Prezıdent Qasym-Jomart Toqaevtyń 2025 jylǵa deıin respýblıkalyq mádenıet jáne arhıv isi uıymdary qyzmetkerleriniń eńbekaqysyn 100%-ǵa kóterý týraly tapsyrmasy aıasynda bıyl 1 qańtardan sala mamandarynyń aılyǵy orta eseppen taǵy 22%-ǵa artty. Osylaısha sońǵy eki jylda 64 myńǵa jýyq mádenıet jáne arhıv isi qyzmetkerleriniń eńbekaqysy orta eseppen 45%-ǵa kóterildi.
«2023 jyldyń qańtarynan barlyq sanattaǵy qyzmetkerlerdiń aılyǵy óskenin atap ótý kerek. Bul basshylar men jetekshiler, negizgi personalmen qatar, eden jýýshy, kúzetshi, vahter sekildi jumyskerlerdiń de eńbekaqysy kóterildi», – dedi QR Mádenıet jáne sport vıse-mınıstri Nurǵısa Dáýeshov.
Mádenıet jáne sport mınıstrligi sala mamandarynyń aılyǵyn odan ári ulǵaıtýǵa bastamashy bolady. Máselen, shyǵarmashylyq joǵary oqý oryndaryndaǵy konsertmeısterlerdiń eńbekaqysyn kóterý josparda bar. Ol úshin zańnamalyq aktilerge tıisti ózgerister engizý boıynsha belsendi jumys júrip jatyr.
Sondaı-aq, «Ulttyq» mártebesi bar mádenıet uıymdary qyzmetkerleriniń eńbekaqysy eki esege jýyq ósti. Búginde elimizde osy sanatqa jatatyn 5 uıym bar. Mınıstrlik aldaǵy ýaqytta atalǵan nysandardyń tizimin keńeıtýdi josparlap otyr.
Qalamgerlerdi qoldaımyz
«Qazaq qalamgerleriniń úzdik shyǵarmalaryna qosa, balalarǵa arnalǵan shetel jazýshylarynyń da tańdaýly týyndylaryn aýdaryp, kóptep basyp shyǵarýdy jáne taratýdy qolǵa alǵan jón», – dep Prezıdent óziniń «Táýelsizdik bárinen qymbat» atty maqalasynda tapsyrma bergen edi.
Memleket basshysynyń tapsyrmasy negizinde Mádenıet jáne sport mınıstrligi tarapynan mynandaı is-sharalar uıymdastyryldy:
- 2021 jyly otandyq qalamgerlerdiń balalarǵa arnalǵan 40 kórkem ádebıeti jalpy taralymy 120 myń danamen basylyp shyǵyp, elimizdegi kitaphanalarǵa taratyldy. Onyń ishinde 4 kitap álem balalar ádebıeti avtorlarynyń qazaq tilindegi aýdarmasy.
- 2022 jyly 23 balalar ádebıeti jalpy taralymy 69 myń danamen aımaqtardaǵy barlyq memlekettik kitaphanalarǵa taratyldy. Onyń ishinde 2-eýi álem balalar ádebıetiniń qazaq tilindegi aýdarmasy.
- 2022 jyly «Úzdik balalar ádebıeti», «Úzdik komıks» syndy 7 nomınasıadan turatyn «Aıboz» ulttyq ádebı baıqaýy uıymdastyryldy. Jeńimpazdarǵa 5 mln teńgeden qarjylaı syılyq tabystalyp, eńbekteri basylyp, kitaphanalarǵa taratyldy.
- 2023 jyly balalar ádebıetin jáne jas qalamgerlerdi qoldaý maqsatynda alǵash ret Prezıdenttik arnaýly ádebı syılyq taǵaıyndalady. Prezıdenttik ádebı syılyq 18–35 jas aralyǵyndaǵy jas qalamgerlerge «Proza», «Poezıa», «Dramatýrgıa», «Balalar ádebıeti» nomınasıalary boıynsha tabystalyp, ár jeńimpazǵa 4 mln teńgeden astam syıaqy beriledi.
Tarıhı qujattar elge qaıtaryldy
Prezıdent tapsyrmasy aıasynda 2022 jyly shetelden 7000 tarıhı qujat elge qaıtaryldy. Qundy qujattarda elimizdiń tarıhy týraly tyń aqparattar bar. Olardy qazir otandyq tarıhshylar men ǵalymdar zerttep jatyr. Qujattar Vengrıa, Germanıa, Italıa sekildi jáne t.b. Eýropalyq Odaq elderinen ákelingen. Byltyr ǵalymdarymyz 14 memleketke izdestirý-zertteý jumystarymen bardy. Olar jınaǵan qujattar qatarynda 445 fotosýret, 206 kitap jáne sırek qoljazbalar bar. Hronologıalyq turǵydan 918–1990 jyldar aralyǵyn qamtıdy.
Qaıtarylǵan qujattar QR Ulttyq arhıvine tapsyryldy. Qazir Mádenıet jáne sport mınıstrligi biryńǵaı derekter bazasyn qurý baǵytynda jumys júrgizip jatyr. Baǵaly tarıhı qujattardy taratý úshin fotoalbomdar, jınaqtar, hronograftar, ómirbaıandyq anyqtamalyqtar jáne basqa da paıdaly materıaldar baspadan shyǵaryla bastady.
«Arheologtar men tarıhshylarymyzdyń jumysy munymen bitpeıdi. 2025 jylǵa deıin qazaqstandyq ǵalymdar shetelge taǵy birneshe ekspedısıa josparlap otyr», – dep atap ótti Mádenıet jáne sport vıse-mınıstri Nurǵısa Dáýeshov.