Ol óz salmaǵynda álemniń absolútti chempıony bolýdy kózdeıdi
Kásipqoı bokstan qyzdar arasynda asa jeńil salmaqta óner kórsetetin qazaqstandyq Angelına Lýkas (8-1) kelesi jekpe-jegin úndi boksshysyna qarsy ótkizedi, dep habarlaıdy almaty-akshamy.kz.
Bul synda báske WIBF chempıondyq tıtýly tigiledi. Bul týraly Lýkastyń ózi Instagram-paraqshasynda jazdy. Onyń aıtýynsha, qarsylasy álsiz emes – alty jekpe-jektiń beseýin jeńgen Mamta Sıngh. Kezdesý Taılandta ótedi.
«Absolútti chempıon bolýǵa kiristim. Ol úshin IBF, IBO, WIBF, WBO, WBC, WBA, WBF belbeýleriniń bárin biriktirýim kerek. Sondyqtan, bul jekpe-jek men úshin óte mańyzdy. 10 raýndqa josparlanǵan tóbeleske daıyndalyp jatyrmyn. Qarsylasym myqty», - dep jazdy ol áleýmettik jelide.
Aıta keteıik, jekpe-jek 25 sáýirde bolady. Angelına Lýkas qazaqstandyqtardy ózine qoldaý kórsetýge shaqyrdy.