Bul zań jobasynda 50-den astam naqty túzetýler kózdelgen.
Týrızm jáne sport mınıstri Ermek Marjyqpaev lýdomanıa jáne býkmekerlik keńselerdiń jumysyn biriktirý máseleleri boıynsha baıandama jasady, dep habarlaıdy Almaty-akshamy.kz
Ol óz sózinde memlekettik organdardyń prezıdent tapsyrmasy boıynsha Parlament depýtattarymen birlesip, azamattar arasyndaǵy qumar oıynǵa táýeldilikpen kúresý úshin zańnamalyq, uıymdastyrýshylyq jáne aqparattyq-ıdeologıalyq sharalar keshenin qabyldaýǵa tıis ekenin aıtty.
Ókinishke qaraı, qumar oıynnyń jeteginde ketip jatqan jastarymyzdyń sany kúnara ósip keledi. Ońaı aqsha tabýǵa shaqyrǵan túrli jarnama jastarymyzdy qumar oıynǵa aldap túsirip jatyr. Qaryzǵa batqan kóp otbasy ajyrasyp, tipti óz-ózine qol jumsaýshylar da bar. Lýdomanıa – bizdiń qoǵamda qaýipti dertke aınaldy. Mınıstrlik oıyn bıznesine qarsy kúres boıynsha memlekettik baqylaý sheńberinde birqatar keshendi sharalar qabyldaýda, – dedi Ermek Marjyqpaev.
Onyń aıtýynsha, búginde elimiz boıynsha oıyn bıznesimen aınalysýǵa 28 lısenzıa berilgen. Onyń 5-eýi – kazıno, 8-i – oıyn avtomattary zaly, 13-i – býkmekerlik keńse jáne 2-eýi – totalızator.
Memlekettik baqylaý sheńberinde oıyn bıznesi qyzmetterine tekserý júrgizilip jatyr. Zań buzylǵan jaǵdaıda olardyń lısenzıalarynyń kúshi joıylady. Bıyl tekseris nátıjesinde 7 býkmekerlik keńseniń, 5 totalızatordyń jáne 1 oıyn avtomattary zalynyń lısenzıasy toqtatyldy. Qazir sot arqyly taǵy 3 býkmekerlik keńseni lısenzıadan aıyrý rásimi júrgizilýde.
Mınıstrlik AMANAT partıasy fraksıasymen birlesip, «Oıyn bıznesi, býkmekerlik keńseler men lotereıa qyzmetteri» boıynsha arnaıy zań jobasyn daıyndady. Bul zań jobasynda 50-den astam naqty túzetýler kózdelgen. Onyń ishinde býkmekerik keńselerdiń jarnamasyn shekteý, turǵyn úı, dúkenderde, medısına, bilim berý nysandarynda lotomatıkterdi ornatýǵa tyıym salý, onlaın kazınony uıymdastyrýshylarǵa qylmystyq jaýapkershilikti belgileý, onlaın kazınoǵa, zańsyz býkmekerlik keńselerge tranzaksıalar jasaýǵa tyıym salý, ótelmegen qaryzy bar azamattarǵa, onyń ishinde alımenttik jáne salyqtyq jabylmaǵan qaryzy bar adamdarǵa qumar oıyndarǵa qatysýǵa tyıym salý men býkmekerlerdiń qarjy aınalymyn naqty bilý úshin salyq organdarynyń qarjylyq-aqparattyq júılerimen ıntegrasıalaý sıaqty túzetýler bar, – dedi ol.
Mınıstrdiń aıtýynsha, 21 jasqa tolmaǵan jastardy qumar oıynǵa zańsyz qatystyrǵany úshin jaýapqa tartý kózdelgen.