Almatyda WKF karateden jastar men jasóspirimder arasyndaǵy XXI Azıa chempıonaty máresine jetti.
Alataý baýraıynda uıymdastyrylǵan jarysqa sary qurlyqtyń 30-ǵa jýyq elinen 600 tatamı sheberi qatysty, dep habarlaıdy almaty-akshamy.kz.
Jastar men jasóspirimder arasyndaǵy baıraqty básekede Qazaqstan sportshylary 8 altyn, 5 kúmis jáne 11 qola medal oljalap, jalpykomandalyq esepte ekinshi orynǵa ıe boldy. Japonıa karateshileri 14 altyn, 5 kúmis, 4 qola medalmen kósh bastasa, úzdik úshtikti Iran (5 altyn, 6 kúmis, 11 qola) sportshylary túıindedi.
Jarystyń sońǵy kúnindegi kýmıte baǵdarlamasynda Dıas Anarbekov (+84 kg), Bıǵabyl Jolaman (55 kg), Aqnıet Sherızat (50 kg) pen Bella Shamasheva (55 kg) altyn tuǵyrdan kórinse, Asqar Saparǵalıev (87 kg) pen Daıana Darenskaıa (68 kg) fınalda qarsylastaryna ese jiberip, kúmis júlde enshiledi. Al Nıkıta Tarnakın (84 kg), Nıkol Sengel (61 kg) jáne Venera Jaqsybaeva (+ 68 kg) qolaǵa qol jetkizdi.
«Jas karateshilerimizdiń Azıa chempıonatyndaǵy keremet jetistigi elimizde atalǵan sport túriniń qarqyndy damyp kele jatqanynyń aıqyn kórinisi. Bıyl karateshilerimiz halyqaralyq jarystarda óte sátti óner kórsetip jatyr. Máselen, elimizdiń eresekter quramasy Azıa oıyndarynda, álem chempıonatynda top jaryp, úzdikter qatarynan kórindi. Endi mine, jastarymyz qurlyq dodasynda óz myqtylyqtaryn dáleldedi. Bizdiń quramada osyndaı daryndy jas sportshylar ósip kele jatqany qýantady», - dep atap ótti Sport jáne dene shynyqtyrý isteri komıtetiniń tóraǵasy Erbol Myrzabosynov.
Aıta keteıik, búgin karateden eresekter arasyndaǵy 1-shi Azıa ashyq chempıonaty bastaldy. Jarys 10 qarashaǵa deıin jalǵasady.