Almaty qalasy Jastar saıasaty basqarmasynyń qoldaýymen, «Rýh jańǵyryǵy» qoǵamdyq qorynyń uıymdastyrýymen «Internetke táýeldilik jáne qumar oıyndarynyń aldyn alý» jobasy boıynsha «Lýdomanıaǵa qarsy kúrestegi ózekti máseleler» taqyrybynda «Dóńgelek ústel» ótti.
Jıynǵa Almaty qalasy máslıhatynyń depýtaty Erkin Raqyshev, ál-Farabı atyndaǵy Qazaq ulttyq ýnıversıtetiniń Fılosofıa kafedrasynyń aǵa oqytýshysy Ábdirashıt Bákiruly, mádenıettanýshy Berdaly Ospan men psıholog mamandar qatysyp, jastar arasynda beleń alǵan qumar oıynnyń saldary men onlaın kazınolarmen kúres joly aıtylyp, atqarylǵan is- sharalar talqylandy.
«Qazaqstan boıynsha 350 myńnan astam adam osy dertke shaldyqqan. Balalar men jastar ǵana emes, úlkender de qumar oıynǵa berilip, ózin qoǵamnan joǵaltyp alyp jatady. Bul jobanyń aıasynda birshama jumys atqaryldy. Jastarmen júzbe-júz kezdesip, is-sharalar jıi uıymdastyrylý kerek», – dedi «Rýh jańǵyryǵy» qoǵamdyq qorynyń múshesi Muhamedjan Toqtaǵululy.
Taqyrypqa oraı
Nursultan BEKQAIYROV, Almaty qalasy Jastar saıasaty basqarmasy Jastar bastamalaryn qoldaý bólimi jetekshisiniń mindetin atqarýshy:
Túsindirme jumystary jıi júrgiziledi
Jastar saıasatynyń bastamasymen ınternet táýeldilik pen lýdomanıaǵa baılanysty birneshe is-shara ótti. 100-ge jýyq zańsyz saıt anyqtalyp, polısıaǵa habarlandy. Osy jumyspen aınalysatyn arnaıy mamandar kúdikti saıttardyń zańsyz ekenin anyqtap, olardyń lısenzıasy bar-joǵyn tekserý úshin polısıa departamentine jiberdik. Qaladaǵy 20 ýnıversıtet pen 20 kolejde, bazarda jumys isteıtin jastarǵa lýdomanıanyń zıany týraly túsindirme jumystary júrgizildi. Osy maqsatta túrli jobalar qolǵa alynady degen senimdemin.