Ulttyq qurama sapynan Parıj Olımpıadasyna lısenzıa jeńip alǵan sportshynyń biri – oq atý sportynyń ókili Aleksandra Le. Otandasymyz Djakartada (Indonezıa) ótken oq atýdan lısenzıalyq Azıa chempıonatynda Olımpıada joldamasyn jeńip aldy, dep habarlaıdy almaty-akshamy.kz.
50 metrden pnevmatıkalyq vıntovkadan oqý atý jarysynyń fınalynda Aleksandra Le jetinshi orynǵa taban tirep, qurama qorjynyna kezekti Olımpıada lısenzıasyn saldy.
«Bul – men úshin kútpegen jańalyq boldy. Olımpıadaǵa joldama jeńip alǵanymdy eń birinshi bapkerimnen bildim. Ol fınaldan keıin men lısenzıa jeńip alǵanymdy aıtpaǵanda, bilmes edim. Qýanyshty jańalyqty estigende qatty tań qaldym», - dep Aleksandra sol kezdegi emosıasymen bólisti.
Keıipkerimiz kásibı sportpen 2017 jyldan beri aınalysyp keledi. Onyń bul sport túrimen shuǵyldanýyna synyptasy sebepshi bolǵan. Oq atý sportynyń jattyǵýyna barmaı turyp Aleksandra mundaı kásibı sport túri bar ekenin bilmegen. Jas sportshynyń sporttaǵy alǵashqy qadamdary sátti bastalǵan soń, ol bul sport túrimen shyndap aınalysa bastaǵan.
«Men bul sportqa kelgende Olımpıadaǵa qatysýdy, eń úzdik nátıje kórsetýdi armandap, óz aldyma maqsat qoıa bastadym. Eger siz óz kúshińizdi tolyq kórsete alsańyz, mindetti túrde jeńiske jetesiz. Men boı túzep, sol sıaqty bolǵym keletin jalǵyz adam bar, ol – meniń jattyqtyrýshym. Iaǵnı, ulttyq quramanyń bas bapkeri – Olga Dovgýn. Men onymen jumys isteý úshin Ulttyq komanda qataryna qatty qosylǵym keldi. Men Olga Dovgýnmen birge jumys istegendi jaqsy kóremin», - deıdi sportshy.
Óz kezeginde ulttyq quramanyń bas bapkeri jáne Aleksandranyń jeke jattyqtyrýshysy jas qyzdyń kásibıligi joǵary deńgeıde ekenin atap ótedi. Onyń aıtýynsha, Aleksandra ózge sportshylardan óziniń talantymen, adaldyǵymen erekshelenip turady.
«Maǵan onyń eń unaıtyn qasıeti, ol sátsizdikke ushyrasa da óz qateligin suraýdan, jańa bir nárse úırenýden eshqashan qoryqpaıdy. Ol árqashan óz oıyn maǵan aıtyp otyrady. Shákirtim jarys jolyna shyqqanda men qoldaý bildirý úshin únemi onyń artynda otyrýǵa tyrysamyn. Ol ony sezedi. Tipti, táýir nátıje kórsetip jatsa da menen qoldaýdy qatty kútedi», - deıdi Olga Dovgýn.
Keıingi jyldary Aleksandra ishki jarystarda da, halyqaralyq básekelerde de úzdik nátıje kórsetip júr. Máselen, ol el chempıonatynda bir altyn, úsh kúmis jáne 1 qola medal jeńip alsa, Ońtústik Koreıada ótken Azıa chempıonatynda 2 qola medal oljalady. Ol óziniń jetistikke jetýinde jaqyndarynyń qoldaýy mańyzdy ról atqaratynyn atap ótti.
«Bir kezderi ákem maǵan «Seni búkil álem tanıtyn bolady» dep aıtqany bar, biraq ol qandaı jolmen tanylatynymdy aıtqan joq. Meniń oıymsha, qolda turǵan múmkindikti eshqashan jibermeý kerek. Men tegimmen árqashan maqtanamyn. Eger tegim osy jerde (Azıa chempıonatynda) kópshiliktiń esinde qalsa, onda búkil álemniń esinde qalady degen sóz», - deıdi Le.