2023 jyldyń qorytyndysy boıynsha.
Bul baǵany Fitch Ratings halyqaralyq reıtıńtik agenttigi qoıdy, dep habarlaıdy Almaty-akshamy.kz
«Almaty» ÁKK emıtentiniń uzaq merzimdi defolt reıtıńi «BBB-» deńgeıinde baǵalandy, boljam «Turaqty», bul korporasıanyń jaqsy kredıt qabilettiligin, kredıttik táýekelder boıynsha tómen kútýlerdi bildiredi. Qarjylyq mindettemelerdi ýaqtyly óteý múmkindigi barabar dep baǵalanady. Bul reıtıń ınvestısıalyq sanatqa jatady.
«Almaty» ÁKK qyzmetin baǵalaý megapolıstiń strategıalyq baǵdarlamalaryn, atap aıtqanda, birkelki jáne turaqty qalalyq orta qurý úshin polısentrıstik damýdy iske asyrýmen tikeleı baılanysty.
2023 jyly korporasıa ınvestısıalardyń jalpy somasy 1,3 trln teńgeden asatyn jobalardy iske asyrýdy bastady. Olardyń ishinde 5G jelisin damytý úshin 16 qos maqsattaǵy tirekti (QMT) salý jobasy bar. ÁKK-niń serpindi jobalarynyń biri – KASE-de jarıalanǵan «jasyl» oblıgasıalardyń debúttik shyǵarylymyna kepildik berý. Osylaısha, Almaty ındýstrıalyq aımaǵynyń aýmaǵynda ınovasıalyq bıoazyqtyq qospalar men tyńaıtqyshtar óndiretin zaýyt salýǵa qarjylandyrý tartyldy. Sondaı-aq Korporasıa qala turǵyndaryn ekologıalyq kólikpen (elektromobıldermen) qamtamasyz etý boıynsha birqatar servıstik jobalarǵa qoldaý kórsetti.
«Almaty» ÁKK áleýmettik mańyzy bar azyq-túlik taýarlaryna (ÁMAT) baǵany turaqtandyrý tetikterin iske asyrý sheńberinde ótken jyly qalanyń saýda obektilerine 13,7 mlrd teńgege 200 myń tonnadan astam ÁMAT jetkizý qamtamasyz etildi.
Jaıly qalalyq ortany qurý baǵytyn iske asyrý úshin turǵyn úı qoryn jańǵyrtý baǵdarlamasyna sáıkes Almatyda 2021-2025 jyldarǵa arnalǵan 142 otbasyn eski turǵyn úıden jańa abattandyrylǵan páterlerge kóshirý qamtamasyz etildi.
«Almaty Business 2025» kásipkerlikti qoldaýdyń óńirlik baǵdarlamasy boıynsha «Almaty» ÁKK enshiles uıymdary – «Almaty Finance» JSHS jáne «Almaty» mıkroqarjy uıymy» JSHS-men 2023 jyly jalpy somasy 6 677,6 mln teńgege 152 joba qarjylandyryldy.
Ótken jyldyń qorytyndysy boıynsha aldyn ala aýdıttelmegen derekter boıynsha «Almaty» ÁKK 8,024 mlrd teńge somasynda taza paıda aldy, kompanıanyń aktıvteri 225,8 mlrd teńgeni, menshikti kapıtaly 167,5 mlrd teńgeni qurady. Búdjetke 8 mlrd teńgeden astam salyq aýdarymdary túrinde tólendi, sondaı-aq 9,5 mlrd teńge somasyna problemalyq aktıvterdi qaıtarý júzege asyryldy.
Esterińizge sala keteıik, «Almaty» ÁKK qalanyń basym áleýmettik mańyzy bar ınvestısıalyq jobalaryn iske asyratyn, bızneske qoldaý kórsetetin óńirlik damý ınstıtýty bolyp tabylady.
Aıta keteıik, Fitch Ratings halyqaralyq reıtıńtik agenttikterdiń «úlken úshtigine» kiredi. Agenttiktiń basty mindeti – álemdik kredıttik naryqtarǵa táýelsiz jáne bolashaqqa baǵdarlanǵan kredıt qabilettiligin baǵalaýdy, taldamalyq zertteýler men derekterdi berý.
Buǵan deıin Fitch Ratings 2023 jylǵy jeltoqsanda Almaty qalasy emıtentiniń uzaq merzimdi defolt reıtıńterin «Turaqty» boljammen «BBB» deńgeıinde rastaǵan bolatyn. Bul degenimiz qaryzdy operasıalyq teńgerimmen qamtamasyz etý kórsetkishi agenttiktiń reıtıńtik senarıi boıynsha aǵymdaǵy reıtıńter deńgeıine sáıkes keledi.