Janbota turǵan baspanany laı tolyq shaıyp ketken
15 mamyr túski saǵat 12-den asqan ýaqyt, Tekeli qalasyndaǵy Qonaev kóshesin bir sátte laı kóshkini basyp qaldy. Shahardyń kelbetine nuqsan kelgeni bylaı tursyn, bútin bir otbasynyń sham-shyraǵy janbaı jatyp sóndi. Búgin kishkentaı perishteniń múrdesin Tekeli jurtshylyǵy jer qoınyna tapsyrdy, dep habarlaıdy Almaty-akshamy.kz.
Marqum, Syrymbet aýylyna jerlendi.
Tabıǵı apattyń saldarynan úıdiń sút kenjesi Janbota Tileýhanova kóz jumdy. 5 jasar oıyn balasy, laı kóshkini shaıyp
ketken úıindiniń astynda qalǵan. Balanyń denesin eriktiler men qutqarýshylar jabylyp izdegenimen 6 saǵattan soń Almaty oblysy TJD «Bagıra» atty qyzmettik ıt taýyp bergen bolatyn. Qapıada bir qarlyǵash máńgi mekenine qanat qaǵyp kete bardy, artynda botam-aı, dep ata-anasy men 12 jasar ápkesi qaldy.
Esterińizge salamyz, tolassyz jaýǵan jańbyr saldarynan taý kóshkini oryn alyp, arty laıǵa aınalǵan. Nátıjesinde 5 birdeı úı búlingen, sonyń ishinde Janbota turǵan baspanany laı tolyq shaıyp ketken edi. Búginde bolashaǵyn án álemimen baılanystyrǵysy kelgen búldirshin de, biraz jyl pana bolǵan úıdiń de orny joq.
Tekeli qalasynyń basshylyǵy aldaǵy tańda apattyń kesirinen úısiz qalǵan otbasylarǵa kómek kórsetetinin jetkizýde.
«Bizde qazir 4 úı buzylyp tur. Onyń tehnıkalyq jaǵdaıyn kórdik. Úıdi satyp beremiz ba, salamyz ba zańǵa sáıkes, komısıanyń sheshimine qaraı qarastyramyz»,- dedi Tekeli qalasynyń ákimi Batyr Moldahmetov.
Jergilikti ákimdik Janbotasyn joqtap otyrǵan januıany baspanamen qamtamasyz etemiz deıdi. Alaıda, endigi jerde áke men ananyń, ápkeniń kóńilindegi qaıaý men ókinishi seıilmesi anyq. Budan bylaı úılerinde janynyń jalaýyna aınalǵan Janbotanyń jarqyn daýsy estilmeıdi.
Qazirgi kezde, kóshkinnen búlingen qala kelbetin qalpyna keltirý jumysy júrgizilýde. Ol úshin QR TJM 28237 áskerı bóliminiń 100 qyzmetkeri men 7 birlik tehnıka jumyldyrylǵan. 16 mamyrdaǵy jaǵdaı boıynsha 890 tekshe metr balshyq shyǵarylyp, 81 reıs jasalynǵan. Qazirgi tańda Qonaev kóshesi laıdan tazartyldy. Qalpyna keltirý jumystary 1-2 kúnde aıaqtalady dep kútilýde.
Hosh, qalanyń kelbeti qalpyna keler. Al, qyzǵaldaǵynan kóz jazǵan otbasy qalypty ómirine orala alady ma? Qaıtkenmen, bir úıdiń bir shyraǵy qaıtadan janbaıdy.