Prezıdent janyndaǵy Ortalyq komýnıkasıalar qyzmetinde merzimdi áskerı qyzmetke shaqyrýdyń kúzgi naýqany jóninde Qorǵanys mınıstrliginiń brıfıńi ótti.
Brıfıń barysynda áskerı qyzmettiń tartymdylyǵy jáne odan jaltarý jaýapkershiligi tóńiregindegi máseleler talqylandy, dep habarlaıdy aqshamnews.kz Qorǵanys mınıstrligine silteme jasap.
Qorǵanys mınıstrliginiń, Ulttyq ulannyń jáne UQK Shekara qyzmetiniń áskerge shaqyrýǵa jaýapty laýazymdy tulǵalary jýrnalıserdiń suraqtaryna jaýap berdi.
QR Qarýly kúshteri Bas shtaby Uıymdastyrý-jumyldyrý jumystary departamenti bastyǵynyń orynbasary polkovnık Farhat Aıdarbaev qazirgi áskerge shaqyrýdyń ereksheligi shaqyrý naýqanynyń ashyqtyǵy jáne jastardyń merzimdi áskerı qyzmetke degen sanaly qadamy dep atap ótti.
– Osy kúzde el Qarýly kúshterine – 10000-ǵa jýyq, Ulttyq ulanǵa – 6 myńnan asa adam shaqyrylady, UQK Shekara qyzmetine - úsh jarym myńǵa jýyq áskerge shaqyrylýshy, Tótenshe jaǵdaılar mınıstrligine – 300-den astam jáne Memlekettik kúzet qyzmetine 250-den asa adam iriktelmek, – dep málimdedi Farhat Aıdarbaev.
Ol sarbazdardyń áskerdegi qyzmettik áreketi qoǵamnyń baqylaýynda ekenin atap ótti. Sarbazdar analary komıtetiniń ókilderine kez kelgen ýaqytta Qarýly kúshterdiń, basqa áskerler men áskerı quralymdardyń áskerı bólimderine barýǵa ruqsat etiledi. «Otbasymen beıneqońyraý» servısi jumys isteıdi. Bul sarbazdarǵa týǵan-týystarymen beıne baılanys arqyly habarlasýǵa múmkindik beredi.
Qorǵanys vedomstvosynyń ókili oǵan qosa merzimdi qyzmettegi áskerı qyzmetshilerge qatysty qoldanylatyn preferensıalarǵa da toqtalyp ótti.
Belgilengen ýaqytta áskerı boryshyn ótegen, jaýyngerlik jáne memlekettik-quqyqtyq daıarlyqta joǵary nátıjeler kórsetken jastarǵa granttar bólý jáne joǵary oqý oryndarynan jataqhana berý normalary zań júzinde bekitilgen.
Joǵary oqý oryndary boıynsha sarbazdardyń reıtıńin anyqtaý jáne bólý «Srochnıkı 2.0» sıfrlyq platformasynda avtomatty túrde iske asyrylady. Joǵary oqý ornyna túsýge daıyndalý úshin áskerı qyzmetshilerge elektrondyq kitaphanany paıdalanýǵa múmkindik jasalǵan.
Qarjy uıymdary aldynda qaryzy bar sarbazdarǵa 14 aı merzimge kredıttik demalys berý – áskerı qyzmetke yntalandyrýdyń taǵy bir faktisi.
Kezdesý sońynda polkovnık Farhat Aıdarbaev áskerden jaltarý sońy aıyppuldar men ákimshilik jazalarǵa ákep soqtyratynyn, al úshinshi tulǵalar arqyly merzimdi áskerı qyzmetti keıinge qaldyrý nemese bosatý áreketteri zańsyz ekenin eske saldy.
– Áskerge shaqyrýdy keıinge qaldyrý jáne odan bosatý memlekettik qyzmet túri bolǵandyqtan, ol qyzmet azamattarǵa «Elektrondyq úkimet» portaly arqyly kórsetiledi. Bul qyzmetterdi kórsetýge jergilikti atqarýshy organdar jaýapty, – dep sózin túıindedi polkovnık Farhat Aıdarbaev.