Almatyda qoǵamdyq keńeste iri shahardaǵy jol qaýipsizdigi máselesi talqylandy.
Qalalyq polısıa departamentiniń bastyǵy Arystanǵanı Zapparov joldar men kóshelerde balamaly kólik, mopedter men elektrosamokattardyń paıda bolýymen jol-kólik oqıǵalarynyń kóbeıgenin aıtty,dep habarlaıdy aqshamnews.kz Polisia.kz-ke silteme jasap.
Jyl basynan beri mopedterdiń qatysýymen 743 jol-kólik oqıǵasy tirkeldi, saldarynan 14 adam qaza tapty, taǵy 757 adam jaraqat alǵan. Al samokattardyń qatysýymen 103 jol-kólik oqıǵasy boldy, 109 adam zardap shekti, abyroı bolǵanda, qaza bolǵandar joq.
– Mopedıster men samokattar jınalatyn oryndarda 8 motoekıpaj turaqty túrde patrúldeý jumystaryn júrgizedi. 32 myńǵa jýyq mopedıst pen 28 myńnan astam elektrosamokat paıdalanýshysy ákimshilik jaýapkershilikke tartyldy. Mamandandyrylǵan aıyppul turaǵyna 1700 moped qoıyldy. Sondaı-aq 100-den astam ata-ana balalaryna samokat pen moped júrgizýge ruqsat bergeni úshin jaýapqa tartyldy. Aldyn alý maqsatynda departament ákimdikpen, sondaı-aq kıksherıng kompanıalarymen jáne moto mektebimen birlese otyryp, jurtshylyqtyń nazaryn jol qozǵalysy qaýipsizdigine, jol qozǵalysy erejelerin qatań saqtaýǵa, elektrosamokattardy, mopedterdi jáne motosıklderdi durys jáne qaýipsiz júrgizý biliktilikterin arttyrýǵa aýdarý maqsatynda “ERKIN QOZGALYS” naýqanyn ótkizdi, – dedi, Arystanǵanı Zapparov.
Jalpy, qalalyq polısıa basshysynyń aıtýynsha, jyl basynan beri shahar joldarynda 3 420 483 jol erejesin buzý deregi anyqtalsa, onyń 1890-y kólikti mas kúıinde basqarǵandar bolǵan.