Kómirdiń ortasha baǵasy tonnasyna 6700-den 9 myń teńgege deıin kóterilgen
Bul týraly ındýstrıa jáne ınfraqurylymdyq damý mınıstrligi arnaıy brıfıńte málimdedi, dep habarlaıdy Almaty-akshamy.kz. KTK telearnasyna silteme jasap.
Kómirdiń ortasha baǵasy tonnasyna 6700-den 9 myń teńgege deıin kóterilgen. Mınıstrlik bul baǵany kómir óndirýshi kásiporyndarmen júrgizgen kelissózder arqyly bekittik dep otyr. Eń kóp suranysqa ıe Shubarkóldiń tonnasy 7500 teńge dep belgilengen. Ol dittigen jerine jetkenshe, ásirese shalǵaı óńirlerdegi tutynýshylardyń peshine túskenshe eki-úsh esege, 25-30 myń teńgeden bir-aq shyǵatyny belgili. Biraq mınıstrlik otynnyń shekti qunyn belgileýge biz qaýqarly emespiz dep aqtaldy. Al baǵaǵa keletin bolsaq, ózge memlekettermen salystyrǵanda bizdegi kómirdiń baǵasy sý tegin degen mınıstrlik ókili, tipti budan tómen baǵa bolýy múmkin emes deıdi.
«Bizde áleýmettik kómirdiń baǵasy áldeqaıda tómen. Salystyrmaly túrde. Eger de halyqpen turmystyq, komýnaldyq kómirdiń baǵasyn alatyn bolsaq jáne qarapaıym bir kirpish shyǵaratyn zaýytqa satylatyn baǵanynyń arasy 30-40 paıyz bolýy múmkin. Iaǵnı halyqtyń sol kómirdi alýǵa 30 paıyzǵa arzanyraq bolady. Munyń ózi arzan. Men salystyryp óttim, kórshi memlekettermen, eki-úsh esege deıin arzan bolyp tur. Endi budan tómen bilmeımin, qanshalyqty, qalaı bolatynyn», dedi QR IIDM Indýstrıalyq damý komıteti tóraǵasynyń orynbasary Turar Jolmaǵambetov.