Mádenıet jáne aqparat mınıstri Aıda Balaeva sý tasqynynan zardap shekkenderge kómek kórsetý maqsatynda «Kúshimiz birlikte» aksıasy bastalǵanyn habarlady.
Memleket basshysy halqymyz úshin basty qundylyqtardyń biri birlik pen ózara kómek ekenin únemi aıtyp keledi. Búginde elimizdiń birneshe óńirinde tabıǵı apat qaýpi kúsheıip, kóktemgi sý tasqyny bastaldy. Keı jaǵdaılarda sý tasqynynyń zardabyn joıýǵa, onyń kúsheıýine jol bermeý úshin jumys kúshi jetispeıdi. Degenmen qazaqstandyq eriktiler qıyndyq kezinde eshqashan shet qalǵan emes. Memleket basshysy da aýyzbirliktiń arqasynda Qazaqstan halqy eń qıyn kezeńderdi eńsergenin birneshe ret atap ótti. Qazir de kóptegen otandastarymyz sý tasqynynan zardap shekkenderge kómek kórsetip, qol ushyn sozyp jatyr – dep jazdy mınıstr.
Ol osy baǵytta mınıstrlikte jedel jıyn ótip, azamattyq qoǵamnyń osyndaı ıgi bastamalaryna qoldaý kórsetý máselesi talqylanǵanyn aıtty.
Zardap shekkenderge kómek kórsetý úshin «Kúshimiz birlikte» aksıasyn bastaý týraly sheshim qabyldandy. Jumysty meniń orynbasarym Evgenıı Kochetov úılestiredi. Qazirdiń ózinde erikti front-ofıster jelisi negizinde zardap shekkenderge kómek kórsetkisi keletinder úshin biryńǵaı baılanys ortalyǵy jumys isteıdi – dedi Aıda Balaeva.
