Kursiv AUTO 2024 forýmy Qazaqstandaǵy avtokólik naryǵyna qatysýshylardyń alǵashqy táýelsiz jıyny retinde ótedi. Bul biregeı sharaǵa salanyń jetekshi kompanıalary, bankter, servıstik kompanıalar, sarapshylar men zertteýshiler qatysady, dep habarlaıdy almaty-akshamy.kz.
Avtokólik naryǵy Qazaqstannyń JİÓ-niń kem degende 2%-yn, ónerkásiptik óndiristiń shamamen 4%-yn jáne bólshek saýdadaǵy satylymnyń shamamen 5%-yn quraıdy. Ótken jyly bul sala sońǵy jyldardaǵy kórsetkishpen salystyrǵanda alǵash ret rekordtyq ósý qarqynyn kórsetti.
Qazaqstandyq avtomobıl odaǵynyń (QAO) derekterine sáıkes, 2023 jyldyń qorytyndysy boıynsha 198,7 myń jańa avtomobıl satylǵan. Bul 2022 jylmen salystyrǵanda 60,2%-ǵa kóp. 2024 jyldyń birinshi toqsanynda da ósý qarqyny baıqaldy. Jańa avtomobılderdiń resmı satylymy (jeńil komersıalyq tehnıkany qosa alǵanda) 39,5 myń birlikke jetip, ótken jyldyń sáıkes kezeńine qaraǵanda 6%-ǵa ósti, al 2023 jyldyń sáıkes kezeńinde 66,5%-ǵa artqan edi.
2023 jyly qazaqstandyq avto qurastyrýshylar 134 myń jeńil avtokólik shyǵardy. 2025 jylǵa qaraı Indýstrıa mınıstrligi jergilikti óndiristiń 160 myń avtomobılge deıin jetedi dep kútip otyr. Bul kóbinese qytaılyq brendterdiń jańa avtomobıl óndiristerin iske qosý esebinen bolmaq.
Osy ózgeristerdiń barlyǵy Qazaqstannyń avtomobıl naryǵyna qalaı áser etedi, boljam men úmit qanshalyqty aqtalady?Naryq quldyraı ma, álde kóterileme me – bul suraqtardyń barlyǵy Kursiv AUTO 2024 forýmynda talqylanatyn bolady.
Sonymen qatar, forýmda avtonesıeleý jáne túrli bankter men mıkroqarjy uıymdaryndaǵy jaǵdaılardy salystyrý máseleleri de qarastyrylatyn bolady.
Forýmnyń negizgi maqsaty – Qazaqstannyń avtomobıl naryǵyna kóp faktorly jáne barynsha táýelsiz kózqaras usyný.