Aýa raıyna baılanysty aýdanda tabıǵı sıpattaǵy tótenshe jaǵdaı jarıalandy.
Shyǵys Qazaqstan oblysynyń Kúrshim aýdanynda tabıǵı sıpattaǵy tótenshe jaǵdaı jarıalandy, dep habarlaıdy Almaty-akshamy.kz
SHQO ákimdigi baspasóz qyzmetiniń málimetinshe, 2024 jyldyń 7 qańtarynan bastap Kúrshim aýdanynda qar men boran toqtamaı tur. Keıbir jerlerde qardyń qalyńdyǵy 1.8-2 metrge jetti. Marqakól jáne Tosqaıyn aýyldyq okrýgteriniń eldi mekenderi kólik qatynasynan ajyratyldy.
Qardyń túsý normalarynyń asyp ketýin jáne eldi mekenderge kólik qatynasynyń bolmaýyn eskere otyryp, Kúrshim aýdanynyń ákimdigi jergilikti aýqymdaǵy tabıǵı sıpattaǵy tótenshe jaǵdaı jarıalady.
"SHQO kólik jáne avtomobıl joldary basqarmasynyń derekteri boıynsha jol júrýdi qamtamasyz etý úshin qosymsha tehnıka jóneltildi. Qazirgi ýaqytta arnaıy tehnıkanyń 24 birligi jumyldyrylǵan. Alaıda boranǵa baılanysty jumys isteý qıyndyq týdyrýda", dedi SHQO ákimdiginiń baspasóz qyzmetindegiler.
Sondaı-aq, Kúrshim aýdanyna qajetti kómek kórsetý úshin SHQO boıynsha TJ departamentiniń Joǵary ótpeli tehnıkasy keldi.
Marqakól jáne Tosqaıyn aýyldyq okrýgteri mektepteriniń oqýshylary 8 qańtardan bastap qashyqtyqtan oqytý formatyna aýystyryldy.
Qolaıly aýa-raıy jaǵdaılary belgilengennen keıin, 16 qańtarda aýyldyq okrýgterdiń turǵyndaryna qajetti azyq-túlik pen dárilik zattardy jetkizý úshin tikushaq jiberildi.
Jaǵdaı jergilikti atqarýshy organdardyń baqylaýynda.