Memleket basshysy Q.Toqaevtyń tapsyrmasyn oryndaý aıasynda Shyǵys Qazaqstan oblysy boıynsha ekologıa departamenti ýákiletti organmen jáne ǵylymı uıymdarmen birlesip, bıylǵy jylǵy 28-30 qyrkúıek aralyǵynda Kúrshim aýdanyndaǵy Kúrshim jáne Qystaý-Kúrshim ózenderiniń lastaný faktisi boıynsha «Vızol» geologıalyq barlaý kompanıasy» JSHS-ne qatysty jospardan tys ekologıalyq tekserý júrgizdi dep habarlaıdy almaty-akshamy.kz
Tekserý barysynda kásiporyndy jaýapkershilikke tartýǵa negiz bolatyndaı Qazaqstan Respýblıkasynyń qoldanystaǵy Ekologıalyq kodeksiniń normalaryna sáıkes kelmeıtin birqatar olqylyqtar anyqtaldy.
Osylaısha, tehnologıalyq sý jınaqtaǵyshtardyń toǵanynan sýdyń jer bederine asyp ketýi jáne Qystaý-Kúrshim ózenine quıatyn tundyrǵyshtan sý aǵyzý faktileri anyqtaldy. Nátıjesinde «Ákimshilik quqyqbuzýshylyq týraly» Kodekstiń (ary qaraı – ÁQBtK) 328-babynyń 1-bóligi boıynsha Ákimshilik quqyqbuzýshylyq týraly hattama toltyryldy.
Aıyppul mólsheri óz erkimen sý aǵyzýdyń kólemi naqtylanǵannan keıin aıqyndalatyn bolady.
Budan basqa, taý-ken jumystarynyń josparyna sáıkes ken ornyn ıgergennen keıin tabıǵı obektilerdi tehnıkalyq jáne bıologıalyq rekýltıvasıa kómegimen negizgi kúıine keltirý kerek. Iaǵnı, tabıǵı landshaftty, aǵash ósimdikterin jáne janýarlar áleminiń tirshilik ortasyn qalpyna keltirý qajet.
«Vızol» GBK» JSHS ýaqytyly zertteýler júrgizbegeni, bıologıalyq negizdeme ázirlemegeni jáne sharýashylyq qyzmet nátıjesinde balyq resýrstaryna keletin zıan oryn almaǵany belgili boldy. Sonymen qatar, taý-ken jumystary turǵysynan qaldyqtardy basqarý júıesi saqtalmaǵan.
Osy buzýshylyqtar úshin kásiporynǵa qatysty ÁQBtK-niń 332-babynyń 2-bóligi jáne 344-babynyń 3-bóligi boıynsha Ákimshilik quqyqbuzýshylyq týraly hattamalar jasaldy. Bul baptar boıynsha salynǵan aıyppul kólemi 200 myń teńgeden asady.
Sonymen qatar, anyqtalǵan buzýshylyqtardy joıý maqsatynda joǵaryda atalǵan taý-ken kompanıasyna qorshaǵan ortaǵa teris áserdiń aldyn alý jáne azaıtý jónindegi tıimdi is-sharalardy iske asyrý, tabıǵı orta komponentterine zertteýler júrgizý, bıologıalyq negizdeme ázirleý jáne balyq qorlaryna keltirilgen zıan úshin ótemaqy júrgizý qajettigi týraly nusqama berildi.
Oryndalǵan jumystardyń nátıjeleri týraly qosymsha habarlanatyn bolady.
Esterińizge sala keteıik, 2021 jylǵy qyrkúıek aıynyń ortasynda Shyǵys Qazaqstan oblysy Kúrshim aýdanyndaǵy Kúrshim jáne Qystaý ózenderi arnalarynyń qaýipti hımıalyq zattarmen lastanýy múmkin ekendigi týraly aqparat áleýmettik jelilerde úlken qoǵamdyq rezonans týdyryp, El Prezıdenti shuǵyl sharalar qabyldaý týraly tıisti tapsyrma bergen bolatyn.