Aqshamnews.kz redaksıasy "Kún sany" aıdarynda aptanyń eń mańyzdy derekterine sholý jasady.
Qazaqstan men Qytaı 24 qujatqa qol qoıdy
Prezıdent Qasym-Jomart Toqaev pen QHR Tóraǵasy Sı Szınpın júrgizgen kelissóz nátıjesinde 24 úkimetaralyq jáne vedomstvoaralyq qujatqa qol qoıyldy.
Eki el delegasıasynyń músheleri energetıka, aeroǵarysh, sıfrlandyrý, keden, aýyl sharýashylyǵy, elektrondy saýda, týrızm, zıatkerlik menshik, medısına, medıa, ǵylym, óńiraralyq baılanys salalaryndaǵy yntymaqtastyqty qamtıtyn qujattarmen almasty.
Qazaqstan Qytaıǵa 1500 kıik tartý etedi
Qazaqstan Prezıdenti Qasym-Jomart Toqaev Qytaıda kıik popýlásıasyn qalpyna keltirý maqsatynda olardy Qytaıdyń batys bóligine qonystandyrý úshin 1 500 kıikti syıǵa berý týraly sheshim qabyldaǵanyn málimdedi.
Qaıtarylǵan aktıvter qarajatynan 400-den asa nysan salynyp jatyr
Qazir jalpy quny 318 mlrd teńge bolǵan 406 jobany qarjylandyrý maquldandy. Onyń ishinde 9 bilim berý nysany, sport salasyndaǵy 3 nysandy, densaýlyq saqtaý salasyndaǵy 162 jobany, sýmen jabdyqtaý salasyndaǵy 159 jobany qosa alǵanda, 333 joba iske asyrylyp jatyr.
Byltyr áleýmettik salaǵa 8,8 trln teńge qarajat bólingen
Májiliste Úkimettiń 2024 jylǵy respýblıkalyq búdjettiń atqarylýy týraly esebi qaralady. Qarjy mınıstri Mádı Takıev 2024 jyly Qazaqstannyń JİÓ ósimi 4,8 bolǵanyn aıtty.
"Búdjet túsimderi 98%-ǵa oryndalyp, shamamen 20 trln teńge tústi. Shyǵystar 23 trln 594 mlrd teńgege atqaryldy. Búdjet tapshylyǵy belgilengen shamadan 3 trln 649 mlrd teńgege nemese jalpy ishki ónimge 2,7% (134 251,9 mlrd teńge) boldy. Memlekettik qaryz naqty JİÓ-niń 23,7% dálizinde jáne 31,8 trln teńge boldy", - dedi vıse-mınıstr.
Densaýlyq saqtaý vıse-mınıstri Tımýr Muratovtiń aıtýynsha, aýyldyq densaýlyq saqtaýdy jańǵyrtý jónindegi ulttyq jobanyń sheńberinde 479 MSAK nysanynyń qurylysy aıaqtaldy.
Bul rette buryn medısınalyq nysandar bolmaǵan aýyldarda 178 nysan salyndy. 301 nysan eskirgen jáne beıimdelgen nysandardyń ornyna salynǵan. 2025 jyldyń aıaǵyna deıin taǵy 176 MSAK nysanyn aıaqtaý josparlanyp jatyr.Jańa oqý jylynda Qazaqstanda 200-den asa mektep salynady
2025–2026 oqý jylynda 300 myńnan asa oqýshy ornyna eseptelgen 200-den asa jańa mektep salý josparlanyp otyr. Sonyń ishinde 206 myń oqýshy ornyna arnalǵan 112 mektep "Keleshek mektepteri" ulttyq jobasy aıasynda paıdalanýǵa beriledi. Jańa mektepterdiń jartysyna jýyǵy aýyldarda ornalasady.