Almaty ákimi Darhan Satybaldy ONAY! qoǵamdyq kólikti dıspecherlik basqarý ortalyǵynda baryp, qalanyń marshrýttyq jelisin baqylaý jáne basqarý jónindegi jumystarmen tanysty.
Megapolıs basshysy qalalyq kólik qozǵalysyna táýlik boıy baqylaıtyn jáne tasymaldaýshylardyń negizgi kórsetkishterin oryndalýyn qadaǵalaıtyn ortalyqtyń qyzmeti týraly baıandamany tyńdady.
«Almaty qalasynyń Kólik holdıńi» JSHS ONAY! dıspecherlik basqarý ortalyǵynyń dırektory Dáýren Sábıtov basty nátıjeler men kórsetkishter týraly baıandady. Almatyda jyl saıynǵy jolaýshylar sany 455 mıllıonǵa jetedi. Búginde ONAY! júıesi 206 marshrýtqa qyzmet kórsetetin avtobýstar, troleıbýstar men metrony qosqanda 3,5 myńnan astam kólik birligi bar. Jeli boıynsha 27 tasymaldaýshy, 3500 avtobýs jáne 6830 aıaldama bar.
Kezdesý barysynda sıfrlyq servısterge erekshe kóńil bólindi. Qalada 4,4 mıllıon kólik kartasy satylǵan, onyń 1,3 mıllıony - áleýmettik. Jolaýshylarǵa yńǵaıly bolý úshin ONAY! mobıldi qosymshasy da bar, onda plasıkalyq kartasyz vırtýaldy kartany paıdalanýǵa bolady.
Qala ákimi qozǵalys aralyǵyn saqtaýǵa jáne kóliktiń úzdiksiz qatynaýyna erekshe nazar aýdardy.
«Qalany aralap júrgende aıaldamada avtobýstardyń tizilip kezekte turǵanyn kórdim. Muny retteý kerek. Ýaqyt kestesi men kólik qozǵalysynyń aralyǵy naqty saqtalýǵa tıis», - dedi Darhan Satybaldy.
Onyń aıtýynsha, holdıńtiń negizgi mindeti qoǵamdyq kóliktiń turaqty jumysyn qamtamasyz etý ekenine erekshe toqtaldy.
Jumys sapary qorytyndysy boıynsha qala ákimi qozǵalys kestesiniń saqtalýyna baqylaýdy kúsheıtý, aıaldamalarda avtobýstardyń turyp qalýyn boldyrmaý jáne birkelki aralyqty jolǵa qoıý, kóliktiń kóbeıýin eskere otyryp, dıspecherlik júıeni jańǵyrtý boıynsha birqatar tapsyrma berdi. Buǵan qosa, Darhan Satybaldy tasymaldaýshylardyń jaýapkershiligin kúsheıtýdi jáne ONAY! sıfrlyq kartanyń jolaýshylardyń barlyq sanaty úshin qoljetimdi bolýyn qamtamasyz etýdi júktedi.