Lıvandyq azamattyń bul ónertabysy taza energıanyń kómegimen isteıdi.
Jergilikti ónertapqysh kún qýatymen túrli taǵam pisiretin pesh jasap shyǵarǵan. Bul jańalyq turmysy nashar halyqtyń jaǵdaıyn biraz jeńildetpek, dep habarlaıdy Almaty-akshamy.kz 24.kz-ke silteme jasap.
Aýyr ekonomıkalyq daǵdarysty bastan keshken Lıvanda janarmaı tapshy. Osynyń kesirinen elektr energıasynyń óndirisi kúrt azaıyp, kúnine tek birneshe saǵat jaryq beriledi. Kásiporyndar men aýrýhanalar jabyla bastady. Ásirese, naýbaıhanalardyń jaǵdaıy máz emes. Nan men toqashtardy daıyndaý úshin elektr energıasy qajet. Al dızeldi generatorlarǵa quıatyn jer maıy joq. Turǵyndar amalyn taýyp, úıleriniń shatyrlaryna kún batareıalaryn ornatyp jatyr. Lıvanda jylyna orta eseppen 300 kún shýaqty bolyp turady. Jergilikti ónertapqysh Týfık Hamdan kún qýatymen isteıtin peshti oılap taýyp, osy máseleni sheshpek.
«Suıyq maı osy aınalardan ótip, 300-400 gradýsqa deıin qyzady. Bul jylýyn taǵam men sýsyndar daıyndaý úshin qoldanamyz. Nan, krýassan sekildi osyndaı temperatýrada pisetin barlyq ónimdi shyǵara alamyz», - deıdi kompanıanyń negizin qalaýshy Týfık Hamdan.
Tájirıbe retinde alǵashqy peshin Remhala aýylyndaǵy naýbaıhanada ornatty. Sonyń arqasynda ol aıyna 10 tonna otyn únemdegenin aıtady.
«Dızel otynyn únemdeýmen qatar ónimimizdiń de sapasy artty. Óıtkeni taza jylýdy qoldanamyz, otynyń ıisi joq. Memleket bizdi elektr qýatymen qamtymaıdy, generatorlarǵa táýeldimiz. Al otynynyń baǵasy sharyqtap ketti», - deıdi naýbaıhana ıesi Vıssam Shamseddın.
Bul joba eldegi áleýmettik ahýaldy jaqsartatyn túri bar. Óıtkeni áreń kúnin kórip júrgen jurtqa nannyń qymbattaýy aýyr tıdi.
«Bul pesh naýbaıhana ıelerine dızel otynyna jumsaıtyn qarajatynyń 80 prosentin únemdeıdi. Sáıkesinshe, nannyń baǵasy da arzandaıdy. Ókinishke oraı, daǵdarys kezinde kóptegen adam áreń kúnin kórip otyr. Sondyqtan nan óndirýdiń ózindik qunyn azaıtyp, azamattarymyz tutynatyn azyq-túlik baǵasyn da tómendete alamyz», - deıdi kompanıa menedjeri Hıtaf Gazal.
Joba sátti júzege assa, el kóleminde iske qosý kózdelip otyr. Sondaı-aq 2030 jylǵa deıin barlyq azyq-túlik pen sýsyndar shyǵaratyn kásiporyndardy taza energıaǵa aýystyrý josparda bar.