«Kózin baılap, tosyn syı ýáde etken».
Shymkentte qyzben kezdesýden keıin er adam ustaldy, dep habarlaıdy almaty-akshamy.kz.
Áleýmettik jelide tanysqan jigitpen kezdesý Shymkent turǵyny úshin qaraqshylyqpen aıaqtalǵan.
Kúdikti izin sýytpaı ustaldy.
«Qala turǵyny birneshe kún buryn ınternette tanysqan er adam oǵan tosyn syı ýáde etip, kózin baılap, páterge aldap kirgizgenin aıtty. Sodan keıin qyzdyń qolyn baılap, as úı pyshaǵymen qorqytyp, ony onlaın shaǵyn nesıege ótinish berýge májbúrlegen. Qaskúnem aqshany dereý esepshotyna aýdartyp, oqıǵa ornynan boı tasalaǵan», - delingen polısıa habarlamasynda.
Er adam birneshe saǵat ishinde qaladaǵy Arbatta ustaldy. Ol jaqynda ǵana megapolıske aqsha tabý maqsatynda kelgen Oral qalasynyń turǵyny bolyp shyqty. Kúdikti ÝUI-ǵa qamaldy.