Elimizde 2035 jyly jalpy kólemi 26,5 GVt elektr energıasy óndiriledi dep boljanýda. Sonyń 9%-yn, ıakı 2400 MVt-ty atom elektr stansıasy jabady dep josparlanyp otyr. Sondaı-aq jańartylatyn energıa kózderiniń úlesi qazirgi 6%-dan 36%-ǵa jetedi dep kútilýde. Al kómir men gaz generasıasy qazirgi 70%-dan 42%-ǵa, ıakı teń jartysyna tómendeıdi.
Bul sharalar aýaǵa taraıtyn zıandy tútinderdiń azaıýyna ákeledi.
Búginde Qazaqstandaǵy parnıktik gazdardyń 81,6%-y kómirqyshqyl gazynan, 12,4%-y metannan, 5,6%-y azot shala totyǵynan turady. 1 GVt elektr energıasyn óndirý úshin 7-120 myń tonna kúkirt totyǵy, 2-20 myń tonna azot totyǵy, 3-7 mıllıon tonna kómirqyshqyl gazy bólinse, 700-1500 tonna maıda kúl jáne 300 myń tonnadan astam iri kúl qaldyq retinde qalady. İri kúl quramynda 400 tonnaǵa jýyq ýly metaldar bar. Al AES arqyly osynsha kólemdegi elektr energıasyn óndirgende, bul qaldyqtardyń eshqaısysy bolmaıdy.
Bastapqyda elimizde AES salýǵa 3 jer tańdalǵanyn bilesizder. Olar – Aqtaý qalasy, Kýrchatov qalasy jáne Úlken eldi mekeni. MAGATE mamandary energetıkalyq torap bolyp sanalatyn Úlken aýylyn quptap otyr. Qazaqstan İİİ jáne İİİ+ býyn reaktorlaryn tańdady. Olar 8 baldyq jer silkinisine tótep bere alady. Balqash kóliniń mańynda bolatyn jer silkinisteri ádette 6 baldan aspaıdy.
Jańa tehnologıalardyń artyqshylyǵy osynda. 9-10 baldyq jer silkinisine shydaıtyn tehnologıalar da bar, biraq ol qarjyǵa baılanysty.