Áz-Naýryz qarsańynda Almaty aspanyn kúı kernedi.
Búgin, 20 naýryz elimizde respýblıkalyq «Kúı kúmbiri» atty chellendji ótip jatyr. Almaty qalasynyń barlyq bilim berý uıymdarynda bir ýaqytta rýhty kúıler oryndaldy dep habarlaıdy Almaty-aqshamy.kz.
Almatydaǵy №161 lıseı, №12 mektep-gımnazıa, №137 jáne Respýblıkalyq fızıka-matematıka mektebi qatarly bilim berý mekemelerinde «Kúı kúmbiri» atty chellendji bir ýaqytta, túski saǵat 12:00-de bastaldy. Respýblıkalyq chellendjini mektep oqýshylarynan quralǵan dombyra orkestrleri ótkizýde. Olar Qurmanǵazynyń «Saryarqa», «Balbyraýyn», «Adaı» qatarly tókpe kúılerin bir ýaqytta oryndady.
Aýqymdy chellendjiniń máni men maqsaty týrasynda Sh.Sh.Ýalıhanov atyndaǵy №12 mamandandylylǵan gımnazıanyń dırektory Qýanysh Jumabekuly bizge óz pikirin bólisti.
«Respýblıka kóleminde ótip jatqan dombra chellendjisi ultymyzdyń bolashaǵy jas urpaqty ulttyq tanymda tárbıeleýdiń tamasha bir quraly. Osy jyldan bastap elimizde birtutas tárbıe degen baǵdarlama júzege asyp jatyr. Onyń maqsaty jalań oqý sapasyn ǵana kózde ustamaı, jetkinshek balalardy ulttyq sana-sezimin jetildirýge baǵyttalady. Búgingi aýqymdy mádenı shara da osynyń mazmundy bir bóligi, ıaǵnı, ulttyq aspaptarymyzdy, ulttyq qundylyqtarymyzdy dáripteý maqsatynda ótip jatyr», – deıdi Qýanysh Jumabekuly.
Tutas el kóleminde mektep oqýshylary qatysyp jatqan aýqymdy chellendjiniń biz №12 gımnazıadaǵy bir kórinisine kýá boldyq. Ári ulttyq aspapqa qyzyǵýshylyq tanytqan jas jetkinshekterdiń qatary mol ekenin anyq ańǵardyq. Atalǵan mamandandyrylǵan mektep-gımnazıasynda jalpy sany 70-ke jýyq oqýshy dombyra úıirmelerine qatysady. Olardyń arasynda halyqaralyq, respýblıkalyq óner saıystarynyń jeńimpazdar da bar deıdi dombyra úıirmesiniń jetekshisi Aıdar Ábilqasymov.
«Dombyra aspabyn oınaǵanda shákirtterimniń árdaıym rýhtanyp, jelpinip otyratynyn baıqaımyn. Búgin mine respýblıkalyq deńgeıde bundaı aýqymdy chellendjiniń ótýi jas urpaqtyń sanasynda ulttyq jadyny jańǵyrtýǵa óz áseri mol boldy dep oılaımyn», – deıdi Aıdar Muratbekuly.
Aıta keteıik, mádenı shara QR Oqý-aǵartý mınıstrliginiń bastamasymen Naýryz merekesine oraı ótkizilip otyrǵan aýqymdy respýblıkalyq aksıa.
