24 jylǵa bas bostandyǵynan aıyrylǵan burynǵy Ulttyq ekonomıka mınıstri Kýandyq Bıshimbaevqa qatysty taǵy eki sot prosesi kútilýde dep habarlaıdy qorǵaýshysy Bıshimbaevtyń Erlan Gazymjanov.
Advokattyń aıtýynsha, aldaǵy sot prosesiniń biri balalaryna tólenetin alıment shartyn ózgertýge baılanysty. Bıshimbaev bostandyqta júrgen kezinde jeke kásippen aınalysyp, turaqty tabys tapqan. Sol sebepti alıment mólsheri joǵary bolyp bekitilgen. Alaıda qazirgi tańda ol eńbekpen qamtylmaǵan, al alımentti onyń ata-anasy tóleýge májbúr.
«Kýandyktiń keıbir jınaqtary boldy, alımenttiń bir bóligi sol jerden de alyndy. Biraq qazirgi jaǵdaıda ol resmı túrde jumys istemeıdi, óıtkeni túzetý mekemesinde bos oryndar az», – deıdi Erlan Gazymjanov.
Alıment shartynyń naqty sharttary qupıa aqparat retinde jarıa etilmedi.
Advokat sonymen qatar Bıshimbaevqa qatysty taǵy bir sot prosesiniń bastalýy múmkin ekenin habarlady. Bul joly másele marqum Saltanat Núkenovanyń aǵasy — Aıtbek Amangeldi tarapynan kóterilgen. Ol Konstıtýsıalyq sotqa shaǵym túsirip, moraldyq ótemaqy kólemin 1,5 mıllıard teńgege deıin arttyrýdy talap etip otyr.
Aıta keteıik, alǵashqy sot ınstansıasy talapkerge 10 mıllıon teńge kóleminde ótemaqy taǵaıyndaǵan. Bul qarajat tolyq tólengen. Alaıda Amangeldi bul somanyń jetkiliksiz ekenin aıtyp, ary qaraı zańdyq kúresti jalǵastyrýda. Apelásıalyq sot alǵashqy sheshimdi ózgerissiz qaldyrǵanymen, endi bul másele Joǵarǵy sot deńgeıine jetip otyr.
Burynǵy mınıstr Kýandyq Bıshimbaevtyń qylmystyq isi boıynsha zańdyq saldarlar jalǵasýda. Alıment kólemin qaıta qaraý jáne moraldyq ótemaqyny arttyrý týraly bastamalar – onyń sottalǵannan keıin de birqatar quqyqtyq jaýapkershilikterge tartylatynyn kórsetedi. Aldaǵy ýaqytta bul isterdiń qalaı sheshiletini qoǵam nazarynda bolary sózsiz.